Projekti ”Sot unë Polic i Kosovës” në Pejë, fëmijët në rolin e zyrtarëve policorë

Në Pejë ka nisur implementimi i projektit “Sot unë Polic i Kosovës”, një nismë kjo e Drejtorisë së Përgjithshme të Policisë së Kosovës në Prishtinë, që po zbatohet nga Drejtoria Rajonale Policore dhe Drejtoria Komunale e Arsimit e këtij qyteti.

Qëllimi i këtij projekti është të afrojë fëmijët me zyrtarët policorë, duke iu ofruar mundësinë që për një ditë të ndihen si policë të vërtetë.

Zëdhënësi rajonal për marrëdhënie me publikun në Pejë, Fadil Gashi tha për Telegrafin se projekti është pritur jashtëzakonisht mirë nga të gjithë pjesëmarrësit.

“Projekti ka kaluar shumë mirë dhe ka qenë i suksesshëm. Qytetarët, nxënësit, policia dhe drejtoritë e arsimit e kanë mirëpritur këtë nismë”, tha Gashi.

Gjithashtu, ai tha se me anë të këtij aktiviteti, fëmijët patën rastin të marrin pjesë në detyrat e përditshme të policëve në trafik, duke komunikuar sipas tij me vozitësit dhe qytetarët, duke mësuar për rëndësinë e respektimit të rregullave të komunikacionit.

“Fëmijët patën mundësinë të demonstrojnë detyrat që policët kryejnë gjatë punës së tyre në trafik, gjë që do t’u shërbejë atyre për respektimin e komunikacionit në të ardhmen”, shtoi Gashi për Telegrafin.

Kjo iniciativë ka ofruar një përvojë të veçantë për fëmijët dhe një mundësi për të njohur nga afër punën e zyrtarëve policorë.