Presidentja e sapozgjedhur e Kosovës, Vjosa Osmani-Sadriu ka pritur në zyrën e saj ekipin e xhudos.
Derisa sot (e marte) pranoi zyrtarisht detyrën nga Glauk Konjufca, që ishte ushtrues detyre i presidentit, në vazhdë kishte disa takime.
Osmani-Sadriu i falënderoi Majlinda Kelmendin dhe trajnerin e saj, Driton Kukën, për mënyrën se si e kanë përfaqësuar Kosovën në arenën ndërkombëtare dhe se si e kanë lartësuar flamurin tonë.
“Në kohën kur edhe politika ka dështuar edhe diplomacia, kanë qenë Majlinda, Distria, Nora dhe të gjitha xhudistete tjera, së bashku me trajnerët e tyre, që na kanë bërë zemrën mal, por mbi të gjitha shtetin tonë dhe kanë lartësuar flamurin e Republikës së Kosovës, edhe në ato shtete që nuk e kanë njohur pavarësinë tonë”, ka deklaruar e para e vendit tonë.
“Xhudistet kanë qenë simbol i Republikës së Kosovës, andaj në këtë ditë ndërkombëtare të sportit dhe paqes, i pres në zyrën time sepse sukseset e tyre jam e bindur se nuk do të mungojnë, mirëpo është e domosdoshme që shteti t’u qëndrojë pranë tyre dhe t’i përkrahë në mënyrën më të mirë të mundshme e mbi të gjitha, flamuri ynë të valojë në çdo vend”.
“Në të ardhmen do të nga gëzoni pa masë dhe të vazhdoni të shkruani histori”, ka shtuar më tej Osmani.
Majlinda e ka falënderuar Presidenten për këtë pritje, duke e siguruar se do të japin maksimumin edhe në të ardhmen që të lartësohet sa më shumë flamuri i Kosovës. /Telegrafi/
