Presidenti i Shteteve të Bashkuara, Donald Trump, tha se ka urdhëruar sanksionet më të larta që ekzistojnë ndaj Bankës Qendrore të Iranit.
Sekretari i Thesarit, Steven Mnuchin, ka shtuar se banka ishte burimi i fundit i fondeve të Teheranit.
"Ne kemi shkëputur tashmë të gjithë burimet e financimit ndaj Iranit", tha Mnuchin.
Shefi i Shtëpisë së Bardhë tha se barrierat e reja ndaj Iranit përbëjnë "sanksionet më të mëdha të vendosura ndonjëherë ndaj një vendi".
Komentet e presidentit vijnë pak ditë pasi ai lajmëroi në Twitter se ka udhëzuar Mnuchin që të rrisë bindshëm sanksionet ndaj Iranit.
Zyrtarët amerikanë, përfshirë Steven Mnuchin dhe sekretarin e Shtetit, Mike Pompeo, kanë akuzuar Iranin për orkestrimin e sulmeve shkatërruese ndaj fabrikave të naftës në Arabinë Saudite.
Irani ka mohuar përfshirjen në sulme. Pentagoni deklaroi më herët gjatë javës se sulmet kanë përkeqësuar ndjeshëm tensionet në rajon.
Sanksionet e reja ndikojnë Bankën Qendrore të Iranit, Fondin e Zhvillimit Kombëtar të Iranit dhe kompani të tjera vendase. /Telegrafi/
