Policia e Maqedonisë: Nuk ka pasur asnjë tentim për atentat ndaj Albin Kurtit

Ministria e Punëve të Brendshme në Maqedoninë e Veriut ka reaguar në lidhje me informacionet për kërcënim të kryeministrit të Kosovës, Albin Kurti, gjatë qëndrimit të tij në Shkup.

Në një prononcim për Telegrafi Maqedoni, zëdhënësi i MPB-së Toni Angellovski, tha se nuk ka pasur asnjë tentim për atentat ndaj Albin Kurtit. Ai tha se siguria për Kurtin është përcaktuar sipas rregullave dhe protokolleve.

Lexo po ashtu RTK: Nga Serbia ka përpjekje për vrasjen e kryeministrit Kurti

“Ju njoftojmë se gjatë vizitës së kryeministrit të Republikës së Kosovës, Albin Kurti, në Shkup, nuk ka pasur asnjë tentim për atentat ndaj tij. Sa i përket sigurisë gjatë vizitës së kryeministrit Kurti, ajo është e organizuar sipas rregullave të paracaktuara dhe vlerësimeve të sigurisë”, tha Angellovski.

Ndryshe, sot RTK raportoi se Albin Kurti gjatë qëndrimit të tij në Shkup është përcjellë nën masa të rrepta të sigurisë, pasi ka pasur informacione për atentat ndaj tij.

Lexo po ashtu Kurti pas kthimit nga Shkupi: Ka shumë kërcënime që rrënjët i kanë në Beograd, kishte forca të shtuara policore

Burime të besueshme nga institucione të sigurisë në Kosovë i kanë thënë për RTK-në, se menjëherë pas mbledhjes së KS të OKB-së, kanë siguruar të dhëna se nga Serbia ka përpjekje për vrasjen e kryeministrit të Republikës së Kosovës, Albin Kurtit në Shkup, ku ka qëndruar mbrëmë./Telegrafi/