Po vjen “Cyber ZERO”, ngjarja që jep përgjigje për çdo lloj kërcënimi online

Tashmë po bëhen përgatitjet e fundit për mbajtjen e Konferencës Ndërkombëtare për Siguri Kibernetike “Cyber ZERO”, një event që bashkon ekspertët dhe institucionet më të rëndësishme të vendit e rajonit, në shënim të Ditës së Privatësisë.

Në njoftim thuhet se data 26,27 dhe 28 janar i jep kuptim secilit diskutim e strategji, që bëhet në luftë me sulmet online dhe kërcënimet në sigurinë kibernetike.

Shoqata Kibernetike Shqiptare e njohur si ACA me shumë partner, duke nisur nga FindBug, Ambasada Amerikane në Prishtinë, Agjencioni për Informim dhe Privatësi, Komuna e Prishtinës, sjellin në KLAN ARENA ekspertë vendor e ndërkombëtarë nga Facebook, Youtube, Google, Cisco, Fortinet, Checkpoint, Palo Alto e shumë prodhues të njohur të fushës së sigurisë kibernetike, të cilët para një audience prej 1000 personave do të diskutojnë dhe prezantojnë format më të reja të mbrojtjes nga sulmet online dhe pajisjet më inovative nga kjo fushë.

Edicioni i 7-të i Konferencës për Siguri dhe Privatësi ruan traditën duke sjellë garën e madhe të hakerëve plisbardhë, që sivjet mbërrin shumën prej 20,000 dollarë, në këmbim të raportimit të dobësive të ueb-faqeve të paraselektuara.

Risi këtë edicion është edhe çmimi “The cyber security Women GAME CHANGER Awards”, që do të shpërblejë tri femra të suksesshme në TIK, si motiv edhe për vajzat e reja, që të bëhen pjesë e fushës së sigurisë kibernetike.

Konferenca e ndarë në dy ditë, në dhjetëra panele, me temat më me interes nga siguria kibernetike dhe privatësia, me ekspertët më eminent, përfaqësuesit e institucioneve shtetërore, kompanive prodhuese, mediave dhe gazetarëve, do të jetë një arenë diskutimi, për të dhënë përgjigje mbi çdo problematike e pasiguri, që aktualisht sfidon mbrojtjen online. /Telegrafi/