Plagoset një person në oborrin e një kazinoje në Breznicë – arrestohen nëntë të dyshuar

Një person, shtetas i Kosovës, është plagosur me armë zjarri në fshatin Breznicë, jashtë territorit të Kosovës.

Policia njofton se i njëjti është transportuar nga familjarët për në Spitalin Rajonal të Gjilanit.

“Drejtoria Rajonale e Policisë Gjilan, Stacioni Policor Kamenicë rreth orëve të hershme të mëngjesit ka pranuar një informatë  ku dyshohet se në zonën e fshatit Breznicë jashtë territorit të Republikës së Kosovës oborrin e një kazinos një person shqiptar shtetas i Kosovës është plagosur me armë zjarri dhe i njëjti nga një familjar i tij është transportuar për në spitalin Rajonal të Gjilanit”, thuhet në njoftimin e policisë.

Tutje, bëhet e ditur se lidhur me rastin janë arrestuar nëntë persona brenda territorit të Republikës së Kosovës, të gjithë shtetas të Kosovës të cilët dyshohet se janë të përfshirë në këtë incident.

“Viktima është trajtuar në Emergjencën e Spitalit Rajonal të Gjilanit dhe sipas mjekut kujdestarë është jashtë rrezikut për jetë”, thuhet tutje në njoftim.

Njësiti Rajonal i Hetimeve në koordinim të plotë me Prokurorin e Shtetit janë duke i hetuar rrethanat se si ka ndodhur rasti, rast i cili sipas Prokurorit të Shteti është cilësuar “Vrasje në tentativë”. /Telegrafi/