Pesë deklaratat e Vuçiqit që dëshmojnë se ai po frikësohet

Presidenti i Serbisë, Aleksandar Vuçiq, gjatë një interviste televizive, njoftoi një luftë të madhe kundër korrupsionit, themelimin e një lëvizjeje të re (të cilës, megjithatë, nuk do t’i prijë vetë), si dhe komentoi protestat studentore.

Në mes të bllokadave dhe protestave studentore, Vuçiq foli më shumë se një orë, duke trajtuar tema të ndryshme të nxehta, por u kthye disa herë te protestat e studentëve.

Nga deklaratat e tij, pesë dolën më të spikatura, duke përfshirë mitingun e SNS në Sava Centar, protestat studentore, luftën kundër korrupsionit, lëvizjen popullore dhe faqen e parë të gazetës nova.

Deklaratat për manipulime me inteligjencë artificiale

Vuçiqi organizoi një takim në Sava Centar të Beogradit, ku pretendoi se priti mijëra “të rinj dhe studentë” për të diskutuar për kreditë e lira të banimit dhe për “mercenarët e huaj” në rrugë.

Megjithatë, pjesëmarrësit kryesorë ishin kryesisht funksionarë të SNS, anëtarë të partisë dhe aktivistë që punojnë në ndërmarrje dhe institucione publike, siç dëshmojnë fotot e publikuara nga ky aktivitet.

Ai deklaroi se disa njerëz kishin përdorur inteligjencën artificiale për të shtuar imazhe të personave që nuk ishin të pranishëm në këtë tubim.

Lexo po ashtu Drejtoi veturën me shpejtësi të madhe, deshi t'i shkelë protestuesit në Serbi

“Me inteligjencë artificiale kanë futur disa njerëz ‘pa dhëmbë’, të cilët nuk kanë qenë aty fare, për të krijuar përshtypjen se në tubim ka pasur njerëz ‘pa dhëmbë’. Imagjinoni sikur ta kishim bërë ne këtë gjë me studentët. Pse do ta bëja unë këtë?”, tha presidenti serb.

Ai pranoi gjithashtu se mund të kishte pasur anëtarë të SNS në takim “mund të ketë pasur njerëz të SNS që kanë dashur të hyjnë ose janë gjendur aty rastësisht”.

Kush i mbështeti protestat, Vuçiq akuzon Kurtin

Shumë personalitete publike kanë publikuar video dhe fotografi për të mbështetur protestën e madhe në Slavija, e cila, me thirrjen e studentëve, mblodhi më shumë se 100 mijë njerëz javën e kaluar.

I pyetur për të komentuar këtë dhe mesazhet e mëparshme të mbështetjes, Vuçiq tha se protestat u mbështetën hapur nga Albin Kurti.

“Albin Kurti i ka mbështetur hapur dhe publikisht. A janë të gjithë politikanët kroatë dhe mediat kroate në krah të protestave, ashtu si edhe të gjithë politikanët e Sarajevës, Milo Gjukanoviq, fakulteti i tij dhe studentët e tij? Mendoj se nuk kam nevojë të shtoj më shumë”, tha Vuçiq.

Sipas tij, nuk ka shumë figura që kanë mbështetur studentët dhe që ai i vlerëson.

“Kryesisht janë të njëjtët që kanë mbështetur edhe protestat kundër litiumit – Novak Gjokoviq, Bogdan Bogdanoviq, Zeljko Obradoviq… dhe kjo është e drejta e tyre. Ky është një dëshmi që në Serbi ka demokraci të gjallë. E pranoj këtë në mënyrë sportive, por mos më hiqni të drejtën që të mendoj ndryshe. Por është diçka tjetër kur njerëzit futen pas perdeve dhe zgjedhin se kush do t’i përfaqësojë, kush mund të bisedojë edhe me Putinin, edhe me Zelenskyn”, tha Vuçiq.

Lufta kundër korrupsionit

Një nga temat në studion e RTS ishte lufta kundër korrupsionit, të cilën Vuçiq e njoftoi deri më 31 mars.

“Nëse dikush ka qenë i korruptuar, do të përgjigjet”, tha ai.

Lideri i SNS njoftoi se një sistem i ri për luftën kundër korrupsionit do të pranojë edhe kallëzime nga qytetarët dhe se të gjitha këto akuza do të hetohen.

Lexo po ashtu Vazhdojnë protestat kundër Vuçiqit në Serbi - shkelet me veturë një profesoreshë që proteston në Beograd

“Do të shihni se do të ketë shumë njerëz nga nivelet e larta të qeverisjes lokale dhe rajonale”, paralajmëroi presidenti i Serbisë dhe shtoi “veprat do të flasin në 100 ditët e ardhshme. Do të shihni ndryshime të mëdha”.

Njoftimi për luftën kundër korrupsionit ka shkaktuar shumë reagime. Kryetari i Partisë së Lirisë dhe Drejtësisë, Dragan Gjilas, tha se Vuçiq duhet të arrestojë veten në mënyrë që kjo aksion të jetë i suksesshëm.

Po ashtu, kryetari i Lëvizjes Popullore të Serbisë, Miroslav Aleksiq, tha se në luftën kundër korrupsionit Vuçiq duhet të fillojë nga vetja, por edhe nga kunetërit e tij dhe vëllai i tij, Andrej Vuçiq.

Lëvizja Popullore, përsëri në qendër të vëmendjes

Tema e formimit të Lëvizjes Popullore, e cila është diskutuar disa herë më parë, u rikthye sërish në fjalimin e tij.

“Do të shihni ndryshime të mëdha”, tha Vuçiq.

Ai konfirmoi se formimi i një lëvizjeje të madhe është e sigurt dhe shtoi se “unë nuk do të jem në krye të saj.”

Sipas tij, nga data 15 mars njerëzit do të kenë mundësi të anëtarësohen në këtë lëvizje. Presidenti serb tha se llogarit tek ata që nuk kanë qenë më parë anëtarë të partive politike, por që duan të punojnë për të mirën e Serbisë, duke menduar për të ardhmen dhe jo për të kaluarën.

“Nuk mund të jem si politikanët e opozitës… Të rinjtë janë e ardhmja e Serbisë, por nuk duhet t’u bëjmë lajka atyre; përkundrazi, presim prej tyre garanci për të ardhmen – që të mësojnë dhe të punojnë”, tha ai.

Gazeta “Nova”

Në studio, Vuçiq iu rikthye edhe një herë një teme të njohur: kritikës ndaj gazetës “Nova”. Ai tregoi faqen e parë të gazetës dhe vazhdoi me fyerje dhe akuza.

“Shihni si funksionon kjo fabrikë gënjeshtrash në vendin tonë dhe si udhëhiqet kjo luftë speciale. Kjo është faqja e parë, këtu shkruhet: ‘Kush janë pjesëtarët e Ushtrisë Serbe që Vuçiq dëshiron t’i përdorë për të shpërndarë studentët: Pushteti po i shndërron Kobrat në mercenarë specialë’. Meqë ju e dini për çfarë po flas, ju pyes: nuk është problem të shkruani që unë jam Hitleri, por si mund të gënjeni kaq rëndë? Si nuk ju vjen turp që të gënjeni kaq rëndë?”, tha Vuçiq.

Lexo po ashtu Kaos para ndërtesës së Kuvendit të qytetit të Beogradit, përleshën aktivistët dhe policia

Ai gjithashtu akuzoi gazetarët e “Nova” se po i bëjnë postimet e Dragan Sholakut, të cilin e quajti një gënjeshtar dhe njeriu që është i vendosur për ta shkatërruar Serbinë.

Megjithatë, disa nga deklaratat e mëparshme të Vuçiqit e kundërshtojnë atë. Ai kishte thënë më parë se njësia speciale “Kobrat” mund të përdoret për të shpërndarë bllokadat e studentëve brenda pak sekondash, nëse ai dëshiron. /Telegrafi/