Përurohen rrugicat brenda oborrit të QKUK-së

Janë përuruar sot rrugicat brenda Qendrës Klinike Universitare në Prishtinë, punimet e të cilave kanë filluar para disa ditësh.

Ministri i Shëndetësisë Uran Ismajli është shprehur se kërkesa që Ministria e tij ka bërë për këtë projekt ka gjetur përkrahjen e ministrit të Infrastrukturës Pal Lekaj.

Ministri i Shëndetësisë e ka vlerësuar si shumë të nevojshëm investimin në ndërtimin e rrugëve në QKU.

“Një punë jashtëzakonisht e mirë, për të cilën falënderojmë Pal Lekajn, i cili pa asnjë dyshim por edhe me një vullnet të madh e ka bërë që sot QKU t’i ketë rrugët e asfaltuara, që ta shtojmë komforin brenda QKU-së. Dihet që këtu vijnë pacientë të cilët ndonjëherë kanë dhimbje. Është e vështirë më kalu nëpër rrugë të vështira”, tha Ismajli.

Ministri i Shëndetësisë tha se së shpejti do të ketë ide edhe për krijimin e hapësirave të reja për parkingje brenda oborrit të QKU-së.

Ministri i Infrastrukturës, Pal Lekaj, ka thënë se ky investim është i dobishëm për pacientët dhe punëtorët në QKU.

“Më vjen mirë që sot bëjmë përurimin e këtij projekti infrastrukturor që ka ndikimi pozitiv tek pacientët , te lëvizja e lirë e tyre por edhe te qytetarët”, tha Lekaj.

Ndërsa drejtori i QKU-së Basri Sejdiu, tha se ashke punimet e tilla ndërinstitucionale janë në dobi të QKU-së dhe rrjedhimisht përmirësojnë cilësinë e shërbimeve që marrin qytetarët aty. Ai është shprehur se po punohet që infrastruktura e institucionit që drejton të vazhdojë të përmirësohet. Më tej, Sejdiu ka shtuar se punimet nuk kanë penguar mbarëvajtjen e punës në QKUK, duke vlerësuar kështu shpejtësinë me të cilën janë kryer punët.

“Ajo që po mundohemi të bëjmë është të përmirësojmë kushtet e ofrimit të shërbimeve shëndetësore, rregullimi e infrastrukturës brendapërbrenda, furnizmin me pajisje. Por, ky rregullim i rrugëve është një ndihmesë mjaft e madhe”, ka theksuar Sejdiu.

Ky projekt përfshin 2.4 km rrugë dhe ka kushtuar 180 mijë euro. I tërë projekti është investim i Ministrisë së Infrastrukturës. /KP/