​Përsëritja e zgjedhjeve në Tërnoc, Meta fton shqiptarët ta votojnë Shaip Kamberin

Presidenti i Shqipërisë Ilir Meta ka ftuar shqiptarët që të votojnë nesër për kandidatin për deputet në Kuvendin e Serbisë Shaip Kamberi në zgjedhjet e përsëritura në Tërnoc.

Si kandidat i vetëm për të përfaqësuar zërin e shqiptarëve në Luginë, atij i duhet e gjithë mbështetja e votuesve të Qendrës numër 6 në Tërnoc, për të kthyer prapa padrejtësinë e ripërsëritjes për herë të tretë të votimit, ka shkruar Meta në Facebook.

“Ftoj të gjithë votuesit shqiptarë në këtë qendër votimi, që nesër masivisht t’u drejtohen kutive të votimit e të mbështesin Shaip Kamberin dhe “Koalicionin e Shqiptarëve në Luginë””, ka shkruar Meta.

Më 27 maj, Shaip Kamberi dhe “Koalicioni i Shqiptarëve të Luginës”, për herë të tretë kërkojnë mbështetjen e shqiptarëve në sigurimin e një vendi në Parlamentin e Serbisë, pasi gjykata administrative në Beograd ka refuzuar ankesën e Koalicionit të Shqiptarëve të Luginës duke e lënë në fuqi vendimin e Komisionit Republikan Zgjedhor për përsëritjen e zgjedhjeve në njësinë numër 6 në Tërnoc.

Kamberi ka thënë se e gjithë kjo synon eliminimin e prezencës së shqiptarëve në Parlamentin Republikan.