Përpiquni të maskoni rrathët e zinj

Rrathët e zinj janë problem shumë i shpeshtë të cilin e vuajnë thuajse të gjithë. Por te disa bien më shumë në sy dhe shkaku nuk njihet.

Kur rrathët e zinj shfaqen në moshë të re (15 deri 25 vjeç), fajin e ka trashëgimia. Pas tridhjetepesë viteve, shfaqja e tyre ka të bëjë me ndryshimet e moshës.

Lëkura nxihet për disa arsye. Së pari, në zonën nën sytë ka një grumbull enësh gjaku dhe pigmenti dhe me kalimin e moshës, kur lëkura hollohet, këto bëhen më të dukshme.

Së dyti, me kohë, lëkura dhe dhjami rrëshqasin poshtë, duke formuar një të dalë gjysmërrethore, e cila lëshon hije dhe i bën më të dukshëm rrathët e zinj, transmeton Telegrafi.

Kozmetologët edhe sot vazhdojnë të punojnë për zbulimin e enigmës së rrathëve të zinj, por ende nuk kanë pasur sukses. Ata janë përpjekur t’ i taposin me laser enët e gjakut, ta fshijnë pigmentin me anën e laserit, që përdoret për fshirjen e tatuazheve, por…pa rezultat.

Problem i ngjashëm janë njollat e pigmentit rreth syve, që formohen zakonisht te njerëzit me lëkurë të errët. Edhe mënyrën për t’i zhdukur ato, mjekët ende nuk e kanë gjetur.

Këshilla:

* Mos blini kremra, që gjoja ju shpëtojnë nga rrathët e zinj; ky është shpenzim krejt i kotë.

* Rrathët e zinj mund të maskohen me ndihmën e produktit maskues, i cili përmban dioksid të titanit ose zinkut (ose të dy bashkë). Këto minerale kanë vetinë për ta kthyer dritën dhe jo vetëm e maskojnë vendin ku vihen, por edhe e ndriçojnë atë.

* Zgjidhni një mjet maskues apo produkt me bazë mineralesh; ata janë më të qëndrueshëm se ata me bazë dylli (këto të fundit bëjnë mirë për puçrrat). Mjetet me bazë dylli ngrohen në lëkurë dhe “rrëshqasin”, prandaj fshihen më lehtë.

* Mos abuzoni me produktet maskuese. Mos e lyeni të gjithë pjesën nën sy. Vendoseni atë te gropëza nën këndin e brendshëm, ku rrathët e zinj bien më shumë në sy, pastaj shtrijeni drejt tëmthave dhe poshtë në formë trekëndëshi. /Telegrafi/