Kurti takoi policët e aksionit kundër kontrabandës në veri: Qeveria e përkushtuar në luftimin e krimit të organizuar

Kryeministri Albin Kurti, ka takuar policët, pjesëmarrës në aksionin e mbrëmshëm kundër kontrabandës në Leposaviq, përfshirë ata që u lënduan, dhe Drejtorin e Policisë së Kosovës, Samedin Mehmeti.

“Policia jonë çdo ditë demonstron vendosmëri dhe shkathtësi për të siguruar ligjshmërinë në tërë territorin e Republikës. Përderisa puna profesionale e policëve ka arritur të sjell personat e dyshuar para drejtësisë, kjo e fundit, në këtë rast Prokuroria, liron njërin të dyshuar në procedurë të rregullt, sipas pohimeve të policëve”, ka thënë Kurti.

Tutje kryeministri shprehu falënderim dhe mirënjohje të thellë për trimërinë dhe profesionalizimin e tyre për të qenë në krye të detyrës, teksa u uroi shërim të plotë sa më të shpejtë.

Ai theksoi që shteti ligjor dëshmohet me punën e zellshme të prokurorisë dhe efikase të gjyqësorit.

“Në mungesë të këtyre të fundit, aksionet e Policisë e me këto sigurimi i rendit publik, mbeten të papërfunduara. E për të dëshmuar përkushtimin dhe aftësinë në vendosjen e sundimit të ligjit, duhet pritur veprimet e mëtutjeshme të prokurorisë”, u shpreh ai.

Kurti shtoi se luftimi i krimit të organizuar dhe vendosja e rendit dhe ligjshmërisë mbeten ndër prioritetet kryesore të Qeverisë dhe se për këtë Policia e Kosovës gjithmonë do ta ketë mbështetjen e plotë.

Ndryshe, sipas PK-së, pesë zyrtarë të saj janë lënduar gjatë një aksioni për të ndaluar një kamion në veri të Kosovës, që dyshohej se po kontrabandonte mallra.

Policët kanë marrë trajtim mjekësor, ndërkaq po ashtu është dëmtuar një veturë policore.

Lexo po ashtu Lëndohen pesë zyrtarë policor në veri, u goditen në veturë nga një kamion i cili po kontrabandonte mallra dhe tentoi të ikte

Sipas njoftimit, në orët e mbrëmjes së 16 korrikut, në fshatin Jashanicë të Leposaviqit, zyrtarët policorë kanë vërejtur kamionin që dyshohej se po kontrabandonte mallra, por në tentim për ta ndaluar kamionin, policia është penguar nga dy automjete civile.

Policia thotë se më pas ka bërë bllokimin e pjesshëm të magjistrales Mitrovicë-Jarinjë me dy automjete policore.

Zyrtarët policorë më pas kanë vazhduar që ta përcjellin kamionin, i cili vazhdoi të udhëtonte me shpejtësi të lartë në magjistralen Mitrovicë-Jarinjë.

“Në përpjekje e sipër për ta ndaluar, vozitësi i kamionit e ka goditur veturën policore për herë të dytë, duke u shkaktuar lëndime zyrtarëve policorë si dhe duke shkaktuar dëme të konsiderueshme materiale”, thuhet në njoftim.

Lexo po ashtu Sveçla për lëndimin e pesë policëve në veri: Hezitimi i organeve të drejtësisë për të vepruar, kthehet në fuqizim të kriminelëve

Ndryshe, gjatë tremujorit të parë të këtij viti, 33 zyrtarë të instituconeve në Kosovë- shumica prej tyre zyrtarë policorë që janë sulmuar gjatë kryerjes së detyrës.

Ndërsa, sa i përket lëndimeve gjatë kryerjes së detyrës zyrtare, policia njofton se në vitin 2021 janë gjithsej 208, ndërsa në gjashtëmujorin e vitit 2022 janë 116.

Jo më larg se para tre muajve, pjesëtarët e Policisë së Kosovës në veri u përballën me sulme të njëpasnjëshme. Nga 13-26 prill ata u sulmuan për gjashtë herë radhazi.

Persona të panjohur qëlluan kundër automjeteve të policisë me armë automatike, AK 47 e granata dore. Po ashtu, u vendosën iriqë metalik në rrugë dhe mjete tjera të forta. Lëndime në njerëz nuk ka pasur, vetëm dëmeve materiale.

Lidhur me këto sulme autoritetet në Kosovë thanë se janë duke zhvilluar hetime intensive, por ende nuk dihet nëse ka persona të arrestuar apo të dyshuar. /Telegrafi/