Përfundon aksioni, largohen 803 deponi ilegale mbeturinash

Fushata tre mujore për pastrimin e Kosovës, e filluar më 15 shtator, ka përfunduar sot pas 3 muajve të aktiviteteve të shumta në tërë Kosovën.

Gjatë kësaj periudhe me angazhimin e institucioneve, Let’s Do It Kosova e mijëra vullnetarë, janë larguar 803 deponi ilegale dhe shumë mbeturina përreth rrugëve e në hapësira publike.

Fushata për pastrimin e Kosovës ka mobilizuar rreth 10% të popullsisë së Kosovës, me rreth 200 mijë qytetarë anekënd Kosovës.

Si rezultat i suksesit që ka arritur kjo fushatë Let’s Do It World ka shpallur Kosovën si shtetin më aktiv dhe më të suksesshëm në fushatën “World Cleanup Day 2018”.

Pas përfundimit të kësaj fushate, me datën 10 janar 2019 do të  mbahet ceremonia e ndarjes së çmimeve për komunat më aktive dhe më të suksesshme të kësaj fushate, e të cilat do të shpërblehen me fonde për realizimin e projekteve në fushën e mjedisit për vitin 2019.

Ministria e Mjedisit dhe Planifikimit Hapësinor dhe Let’s Do It Kosova nëpërmjet një komunikate iu bëjnë thirrje komunave që pas kësaj fushate të pastrimit të angazhohen në mirëmbajtjen e hapësirave publike, të mos lejojnë krijimin e deponive të reja ilegale, të zbatojnë udhëzimin për ndëshkime me gjoba mandatorë, të punojnë në shtrirjen e shërbimeve për mbeturina, si dhe krijim të zonave të gjelbra. Gjithashtu ata bëjnë apel tek qytetarët për mos hedhjen e mbeturinave jashtë vendeve të caktuara, për të mbajtur Kosovën të pastër.

Në fund të kësaj fushate, Ministri Matoshi është deklaruar që angazhimi i tij dhe i ministrisë që ai drejton, do të vazhdojë edhe më tej në krijimin e një sistemi të qëndrueshëm të menaxhimit të mbeturinave në Kosovë, përmes trajtimit efikas të tyre, duke reduktuar ndotjen e mjedisit dhe duke shndërruar ato në përfitime për vendin, thuhet në njoftimin e ministrisë. /Telegrafi