Pendarovski: Me Serbinë kemi të kaluar të përbashkët dhe qëllim të njëjtë

“Miqësinë me Serbinë në të ardhmen pres ta ndërtojmë në mënyrë edhe më intensive sepse ndajmë një të kaluar të përbashkët dhe synojmë ndaj një qëllimi të përbashkët – anëtarësimi në BE. Për qëllimet tona strategjike sot kisha bisedë të dobishme me presidentit e Serbisë, Vuçiq. Bashkimi Evropian nuk guxon ta anashkalojë Ballkanin Perëndimor. Garancia e vetme për stabilitet, siguri dhe prosperitet për rajonin është anëtarësimi në BE”.

Këtë e ka thënë presidenti Stevo Pendarovski pas takimit të sotëm me presidentin serb Aleksandar Vuçiq në Beograd.

Presidenti Pendarovski i cili po qëndron për vizitë zyrtare dyditore në Serbi, paradite u prit nga Vuçiqi para Pallatit Serbia në Beograd me nderime më të larta shtetërore dhe ushtarake.

Dy presidentët patën takim tet-a-tet, në të cilin i konfirmuan marrëdhëniet miqësore mes Republikës së Maqedonisë së Veriut dhe Republikës së Serbisë dhe e potencuan rëndësinë dhe përkushtimin e ndërtimit, mirëmbajtjen dhe avancimin e dialogut të ndërsjellë.

Pas takimit të dy presidentëve, u mbajt edhe takim plenar mes delegacioneve të Republikës së Maqedonisë së Veriut dhe të Republikës së Serbisë, pas çka do të vijojë edhe konferencë e përbashkët për shtyp të presidentëve.

Gjatë konferencës së përbashkët, presidenti serb kishte një koment interesant për Pendarovskin, të cilit i tha të mos i vendos dëgjueset për përkthim, pasi e flet serbishten mjaft mirë.

Ndryshe, Pendarovski nesër në Novi Sad do të marrë pjesë në Forumin e 4-të rajonal rinor dhe do të ketë fjalim në panel-diskutimin presidencial “Fjalim i të rinjve para përfaqësuesve të pushtetit: Prezantim i dialogut politik para mijëvjeçarve”, së bashku me presidentin e Republikës së Serbisë, Aleksandar Vuçiq dhe presidentin e Sllovenisë, Borut Pahor./Telegrafi/