Peja gati për vitin e ri shkollor, me përjashtim të dy shkollave – vërehet rënie e numrit të nxënëseve në zonat rurale

Në prag të fillimit të vitit shkollor, shkollat e qytetit të Pejës po përgatiten për të mirëpritur rreth 1313 nxënës në klasën e parë.

Zonat rurale mbeten sfidë për Drejtorinë e Arsimit në Pejë pasi ikjet nga këto vende kanë ndikuar në rënien edhe të numrit të nxënësve.

Drejtori i Arsimit në Pejë, Naser Gega tha për Telegrafin se numri prej 1313 nxënësish të regjistruar për klasën e parë është solid.

Megjithatë është shprehur Gega, sfida më e madhe mbetet në zonat rurale, ku ka një rënie të vazhdueshme të numrit të nxënësve, duke e bërë më të vështirë përzgjedhjen e mësuesve dhe organizimin e klasave.

“Deri më tani kemi përafërsisht 1313 nxënës për klasë të parë, është numër solid. Kërkesa për regjistrim në klasë të parë tash është bërë më problematike, përzgjedhja e mësuesit, ato mendësitë tona… Disa shkolla e tejkalojnë, disa shkolla kanë probleme akoma dhe pritet ta tejkalojmë edhe këtë situatë. Nuk kemi telashe, nxënës kemi mjaftueshëm, por numri i nxënësve është duke rënë sidomos në zonat rurale”, ka thënë drejtori Gega për Telegrafin.

Përveç sfidave me regjistrimet, dy shkolla në Pejë po përballen edhe me vonesa në përfundimin e projekteve infrastrukturore.

Ai ka shtuar se derisa këto punime të përfundojnë, nxënësit e shkollës “Vaso Pashë Shkodrani” do të vazhdojnë mësimin në objektin e vjetër, ndërsa atyre të Vitomericës i është siguruar transporti nga komuna për në shkollat përkatëse në Novosellë respektivisht Osdrim në mënyrë që asnjë nxënës të mos mbetet jashtë procesit mësimor.

“Vonesa nuk do të ketë në asnjë shkollë mirëpo presim p.sh shkolla ‘Vaso Pashë Shkodrani’, të kryhen procedurat dhe të kalohet në objektin e ri edhe shkolla e Vitomericës edhe aty ende nuk kanë përfunduar punimet, nxënësit për fillim vit do të shkojnë prapë njëjtë komuniteti boshnjak në fshatin Osdrim dhe komuniteti shqiptar në Novosellë. Komuna ka siguruar transportin e tyre… ”, është shprehur ai.

Duke folur për plan-programin mësimor, Gega shpjegoi se pavarësisht sfidave, ai do të mbetet i njëjtë.

Gega shtoi se përzgjedhja e njësive mësimore dhe materialeve të punës është bërë, duke u mundësuar mësimdhënësve të zgjedhin librat dhe materialet mësimore që i përshtaten më mirë nevojave dhe interesave të nxënësve.

“Plan programi është i njëjtë mirëpo e kanë lirinë e përzgjedhjes në kufi të normales për çka parasheh plan programi mësimor, mirëpo përzgjedhjen e njësive brenda tanësisë mbetet diçka e mësimdhënësit, nxënësit më mësimdhënës kanë përzgjedhur edhe me cilat libra dëshirojnë të punojnë ata dhe në bazë të tyre ata do të furnizohen”, ka përfunduar Gega.

Në përfundim, Drejtori Naser Gega mbetet optimist se, pavarësisht sfidave me regjistrimet, infrastrukturën dhe përzgjedhjen e mësuesve, të gjitha shkollat në Pejë do të jenë të përgatitura për fillimin e vitit të ri shkollor. /Telegrafi/