​PDK kundër kandidatëve për bord të AKP: Transformimi nuk bëhet me këta njerëz

Partia Demokratike e Kosovës e ka kundërshtuar propozim-vendimin e Qeverisë së Republikës së Kosovës për emërimin e drejtorëve të Bordit të Agjencisë Kosovare të Privatizimit.

Deputeti nga Partia Demokratike e Kosovës, Ferat Shala ngriti pikëpyetje për kandidatët e propozuar për bord të AKP.

“Grupi ynë parlamentar, e kemi thënë edhe ditë më parë në Komision që është kundër këtij propozimi për faktin që do i themi më vonë, është kundër sepse po t’i referohemi diskutimit të kryeministrit që në parim pajtohemi që duhet një transformim të pronës natyrshëm rrjedh pyetja se me kënd do e transformojnë këtë pronë me ata që parimisht kanë një eksperiencë të tërë për ta realizuar nga e kaluara konsideroj se ekipet profesionale nuk janë më të mira të mundshme dhe kemi dyshimin tonë të bazuar që CV e tyre për transformim të pronës nacionale në kuptimin edhe ideologjik dhe politike nuk janë të përshtatshme me ekonominë e lirë të tregut që sot duhet t’i ofrohet shtetit tonë”, tha ai.

Tutje ai pati kritika edhe për Nazmi Mikullovcin i cili nga qeveria është propozuar si kryesues i Bordit të AKP-së.

“Në Trepçë kryesuesi që sot na propozoni ju ka qeverisur 7 vite pas luftës dhe ndërmarrjen Trepça e ka lënë në gjendjen më katrahurë nëse e shohim CV menaxhuese që ka mund të jetë pas luftës me dhjetëra milionë euro borxhe, me asete të paregjistruara pas luftës pa asnjë shkresë zyrtare me një rregullore të UNMIK-ut që nuk ka bërë kërkesë për ta ndryshuar”, tha ai.

Shala tha se është pro transformimit por jo me individët që janë propozuar nga qeveria e Kosovës.

“Kosova ka kapacitet të mjaftueshme që e njohin këtë sektor, që e njohin ekonominë dhe transformimin dhe sot na sillni këtë personalitet, unë jam pro transformimit por jo me individë që e kanë shkaktuar dhe e kanë dëmtuar procesin jo me individë që kanë shkaktuar problem në të gjithë agjencitë e këtij sektori, jo me individë që kanë konflikt interesi edhe juridik e financiarë”, u shpreh Shala.

Emrat e kandidatëve për anëtarë të Bordit të AKP-së që do t’i propozohen Kuvendit janë: Nazmi Mikollovci, Suzana Dautaj-Surdulli, Mentor Hyseni, Vjollca Jashari, Violeta Arifi Krasniqi, Xhevdet Neziraj, Halim Muqolli dhe Avni Ajdini. /kp/