Pas një tragjedie fatale, shtatë familje padisin TikTok

Pasi përjetuan të pamendueshmen, shtatë familje franceze po padisin TikTok.

Ato pretendojnë se platforma i ekspozoi fëmijët e tyre adoleshentë ndaj përmbajtjeve të dëmshme që ata besojnë se kontribuan në vetëvrasjet e dy 15-vjeçarëve.

Çështja në gjykatën e Creteil është padia e parë kolektive e kësaj natyre në Evropë, sipas avokates të familjeve, Laure Boutron-Marmion.

Mediat e huaja bënë të ditur se të shtatë familjet raportuan të njëjtën çështje: një rënie në shëndetin fizik dhe mendor të fëmijëve të tyre.

Këto familje janë bashkuar përmes kolektivit Algos Victima – një qendër për mbështetje ligjore dhe gjyqësore për viktimat dhe familjet e tyre.

Ata akuzojnë TikTok dhe algoritmin e tij për ekspozimin e fëmijëve të tyre ndaj përmbajtjeve të rrezikshme, duke përfshirë video të shumta që promovojnë vetëvrasje.

Siç raportohet, rasti përfshin dokumentacion thelbësor dhe prova konkrete që mbështesin historinë e secilës familje, përcjell Telegrafi.

Ky veprim i ri ligjor bazohet në një kallëzim të mëparshëm penal të paraqitur në vitin 2023 nga prindërit e Marie, një prej adoleshenteve që kreu vetëvrasje.

Ndryshe, sipas avokates të familjeve, TikTok është “në krye” të përmbajtjes që shohin përdoruesit, duke theksuar se versioni kinez i platformës është dukshëm më i moderuar dhe pa përmbajtje të dëmshme.

Duke lënë mënjanë faktin që qeveria amerikane bëri lëvizje për të detyruar ByteDance t’i shesë TikTok një partie me bazë në SHBA ose të ndalohet në SHBA, aplikacioni është nën kritika nga e majta dhe nga e djathta.

Teksasi së fundmi ngriti një padi kundër TikTok për shkeljen e një ligji të ri për privatësinë e fëmijëve, një veprim që pasqyron shqyrtimin e vazhdueshëm me të cilin përballet platforma nga ligjvënësit dhe qeveritë.

Aktualisht, prokurorët e përgjithshëm nga 14 shtete dhe Distrikti i Kolumbisë kanë nisur gjithashtu padi të veçanta kundër TikTok, duke pretenduar dëmtim të shëndetit mendor të fëmijëve dhe shkelje të Aktit federal për Mbrojtjen e Privatësisë në internet të Fëmijëve (COPPA).

Kritikët argumentojnë se masat e sigurisë së fëmijëve të TikTok janë joefektive, pasi fëmijët mund të anashkalojnë lehtësisht verifikimin e moshës. /Telegrafi/