Pas fitores 2-1 të Chelseat ndaj Palmeirasit në çerekfinale të Kupës së Botës për Klube, Cole Palmer u pa në një bisedë të afërt me yllin brazilian 18-vjeçar, Estevao Willian – i cili pritet t’i bashkohet "Bluve" së shpejti.
I pyetur për çfarë i kishte thënë Estevaos gjatë momentit të kapur nga kamerat, Palmer u përgjigj me humor.
“I thashë që mezi po presim ta kemi në ekip, por ai nuk kuptoi asnjë fjalë që i thashë”, deklaroi anglezi pas ndeshjes.
Pavarësisht barrierës gjuhësore, komunikimi ndërmjet të dyve përcolli respekt të ndërsjellë dhe një mirëseardhje të sinqertë – e shoqëruar me buzëqeshje dhe gjestet miqësore.
Estevao, i njohur si një nga talentet më premtues të Brazilit, shënoi golin e vetëm për Palmeirasin në këtë ndeshje, duke i dhënë Chelseat një shije të asaj që mund të presë nga ai në të ardhmen.
Ky takim ishte një paralajmërim i këndshëm për tifozët e Chelseat, të cilët mezi presin të shohin Estevãon me fanellën blu në sezonet që vijnë. /Telegrafi/
