Kandidatja për deputete nga Lëvizja Vetëvendosje, Fitore Pacolli ka thënë se dialogu politik ka dëmtuar procesin e njohjeve për Kosovën.

Pacolli, Debat Plus me Ermal Pandurin në RTV Dukagjini, ka thënë se pas fillimit të procesit të dialogut shtetet e ndryshme filluan të dyshonin nëse Kosova është shtet i pavarur apo jo, përcjell Telegrafi.

“Kulmi i dyshimeve arrihet kur presidenti Thaçi hap një diskutim tjetër tejet të rrezikshëm, atë për kufijtë e Kosovës. Madje në këtë periudhë fillojnë edhe çnjohjet”.

Fitore Pacolli nga Lëvizja Vetëvendosje, ka kritikuar ish ministrat e jashtëm të Kosovës për dështimin e diplomacisë.

“Të nisemi nga fillimi. Hashim Thaçi i ka fajet kryesore bashkë me Enver Hoxhajn, pastaj me Behgjet Pacollin. Kjo pasi Enver Hoxhaj, si ish ministër ka lobuar nëpër shtete që nuk e kanë njohur Kosovën duke dhënë premtime e pastaj nuk i ka realizuar ato premtime. Kjo i ka bërë dëm vendit”, ka thënë Pacolli.

Fitore Pacolli ka deklaruar më tej se ministri i Jashtëm Behgjet Pacolli ka bërë më shumë lobim për bizneset e tij sesa për shtetin e Kosovës.

“Behgjet Pacolli ka bërë politik të jashtme sikur të bënte biznes, më shumë ka lobuar për bizneset e tij . Pikërisht tërheqja e njohjeve po vjen nga shtete që i ka sjell Pacolli si njohje”, ka shtuar Pacolli./Telegrafi/