Pacolli: Mërgimtari refuzoi t’i japë ryshfet policisë serbe, e ndaluan për 45 minuta në Merdar

Kryetari i Aleancës Kosova e Re, Behgjet Pacolli, ka thënë se qytetarët e Kosovës çdo ditë po i nënshtrohen ndalesave, keqtrajtimit dhe grabitjeve të pajustifikuara nga policët serbë në pikat kufitare.

Sipas Pacollit, rasti më i fundit ka ndodhur sot në vendkalimin Merdar, ku sipas tij, “një kosovar E.E. (shtetas zviceran) që  po udhëtonte për në Kosovë, për një varrim familjar u ndalua për një kohë të gjatë, pa ndonjë arsye”.

“Atij  iu kërkua ryshfet. Për shkak të refuzimit për të paguar, ai u mbajt mbi 45 minuta, madje tentuan t’i konfiskojnë edhe ilaçet që i përdor çdo ditë (duke ia përplasë ato për tokë). Çfarë primitivizmi, çfarë kulture!!!”, ka shkruar Pacolli, transmeton Telegrafi.

Më tej ai ka pyetur se “A është ky shteti që ka ndërtuar zotëri Vuçiqi!”, duke treguar se  rasti ka ndodhur sot në orën 19:30.

“Këto raste janë vetëm disa prej rasteve të përditshme të keqtrajtimeve  skandaloze të udhëtarëve nga policia (shumë herë në gjendje të dehur) e Serbisë, që duhet raportuar dhe dënuar nga të gjitha autoritetet ndërkombëtare”, ka shkruar Pacolli.

Ndryshe, bashkatdhetarët që po vijnë për pushime në Kosovë përmes Serbisë, po shmangin vendkalimin kufitar në Merdar.

Sipas Qendrës Kombëtare për Menaxhimin e Kufijve, pritjet më të gjata për të hyrë në Kosovë sot janë regjistruar në vendkalimin te Dheu i Bardhë, ku bashkatdhetarët po presin deri në katër orë. Ndërsa, në Merdar pritjet janë 3-5 minuta. /Telegrafi/