Presidentja e Kosovës, Vjosa Osmani, në margjinat e Konferencës së Sigurisë në Mynih, ka takuar Presidentin e Këshillit Evropian, Antonio Costa.
Osmani, në një postim në Facebook, ka thënë se është koha që BE-ja ta njohë dhe vlerësojë progresin e Kosovës.
“Populli ynë ka dëshmuar përkushtim të palëkundur ndaj vlerave evropiane dhe ka bërë hapa domethënës në rrugëtimin drejt integrimit. Është koha që BE-ja ta njohë dhe vlerësojë këtë progres, përfshirë duke larguar masat e padrejta dhe duke i hapur rrugë Kosovës drejt statusit të kandidatit”, ka shkruar Osmani.
Presidentja Osmani takoi sot edhe presidentin e Letonisë, Edgars Rinkeviçs.
Ajo tha se Kosova dhe Letonia janë të paluhatura në angazhimin për siguri, paqe dhe vlerat që na bashkojnë.
“Takim i shkëlqyer me Presidentin e Letonisë, Edgars Rinkeviçs në Konferencën e Sigurisë në Mynih. Si dy shtete në frontin e parë të ruajtjes së demokracisë, Kosova dhe Letonia janë të paluhatura në angazhimin për siguri, paqe dhe vlerat që na bashkojnë”, ka shkruar Osmani.
Ajo është shprehur mirënjohëse për mbështetjen e palëkundur të Letonisë në rrugëtimin tonë euroatlantik.
Osmani ka zhvilluar një takim me Gjeneralin Christopher Cavoli, Komandantin Suprem të Forcave Aleate për Evropë (SACEUR) në NATO.
Në njoftimin e presidentes në Facebook, thuhet se gjatë takimit kanë diskutuar mbi rolin e pazëvendësueshëm të NATO-s në Kosovë gjatë 23 viteve të fundit në mbrojtje të sigurisë dhe stabilitetit.
“Në këtë kohë përcaktuese për kontinentin evropian, riafirmova përkushtimin e institucioneve të Republikës së Kosovës për një bashkëpunim të ngushtë me aleancën, duke kontribuar aktivisht në sigurinë e rajonit dhe më gjerë”, ka shkruar Osmani, transmeton Telegrafi.
Osmani sot ka takuar delegacionin e kongresistëve amerikanë.
“Mbështetja e Kongresit Amerikan ka luajtur një rol kyç në shkrimin e historisë së Kosovës së lirë, të pavarur dhe sovrane. Kjo mbështetje vazhdon edhe sot, ndërsa punojmë së bashku për të adresuar sfidat e përbashkëta dhe për të hapur kapituj të rinj bashkëpunimi që thellojnë dhe fuqizojnë më tej aleancën tonë historike”, ka shkruar presidentja.
Presidentja Osmani takoi sot edhe deputetët Annette Widmann-Mauz dhe Jurgen Hardt nga radhët e CDU-së.
Presidentja Osmani ka shkruar se bashkëpunimi me Gjermaninë mbetet një nga prioritetet kryesore, e CDU si parti ka kontribuar ndër vite në kultivimin e marrëdhënieve tona bilaterale. /Telegrafi/
