Osmani: FSK po shndërrohet në ushtri moderne, sinonim i shtetësisë dhe paprekshmërisë së territorit

Presidentja e vendit, Vjosa Osmani, kryeministri Albin Kurti, ministri i Mbrojtjes, Armend Mehaj dhe komandanti i FSK-së, gjenerallejtënant Rrahman Rama, kanë marrë pjesë sot në përmbyllje të ushtrimit “Defender Europe 21”.

Presidentja e vendit, Vjosa Osmani, tha se sot po e sheh të jetësuar ëndrrën e secilit ushtarak, të secilit qytetar që kanë pritur me dekada të tëra që të shohin demonstrime ushtarake përkrah aleatëve strategjik, e veçanërisht duke demonstruar profesionalizëm me ushtrinë e Shteteve të Bashkuara të Amerikës.

“E themi kumbueshëm sot se përtej lumturisë që ne a sjell demonstrimi i përbashkët ushtarak, gatishmëria për ta thelluar partneritetin strategjik me aleatët tanë perëndimor është e paluhatshme… 22 vjet më parë gra e burra, të udhëhequr nga ideali i lirisë u rreshtuan nën emblemën e UÇK-së, dëshmuan këmbënguljen për ta fituar lirinë, patën guximin dhe vendosmërinë për të qëndruar fortë në kauzën e lirisë. Mbi të gjitha patën fatin të vepronin nën flamurin e një aleance të fuqishme me perëndimin të krijuar ndër vite me urti e durim”, u shpreh presidentja, raporton Telegrafi.

Ajo tha se “qytetarët e Kosovës e kanë ditur se duke mbrojtur shtëpitë tona, duke luftuar për lirinë tonë ne i kemi mbrojtur vlerat universale të lirisë”.

“Si vend e si komb, kemi pasur qëllim të vetëm mbrojtjen e atdheut tonë, e të lirisë sonë… ushtria jonë është rritur dhe krijuar mbi këtë vizion për ushtri moderne.

Jam e lumtur të shoh se si FSK po shndërrohet në ushtri moderne e partner i besueshëm i aleatëve tanë”, tha Osmani.

Presidentja e vendit më tej shtoi se Forca e Sigurisë së Kosovës është sinonim i shtetësisë sonë, mbrojtjes së sovranitetit dhe i paprekshmërisë së territorit, burim nga rrjedh fuqia jonë kohezive për të qëndruar fort përkrah popujve liridashës, në partneritet të ngushtë me SHBA-të dhe shtetet tjera perëndimore.

Ndryshe, Forca e Sigurisë së Kosovës me 330 ushtarë ishte pjesë e stërvitjes “Defender-Europe 21”, ushtrimet e së cilës në Kosovë janë zhvilluar nga 17 maji dhe arena e trajnimeve ishte në fshatin Babaj i Bokës në Gjakovë.

Kosova ishte një prej 16 vendeve pritëse të “Defender Europe 21”, që është një stërvitje e përbashkët mbrojtëse shumëkombëshe e drejtuar nga ushtria amerikane.

Në “Defender-Europe 21”, kanë marr pjesë 27 shtete me mbi 28 mijë ushtarë. /Telegrafi/