Numri i të vdekurve në Gaza mund të jetë sa pesëfishi i shifrave zyrtare – thotë një raport i ri

Numri i të vdekurve nga sulmet ajrore dhe tokësore izraelite nëntëmujore në Gaza mund të jetë pothuajse pesëfishi i shifrave zyrtare, sipas një raporti të ri që vlerëson se numri i viktimave mund të kalojë në mbi 186,000.

Ministria e Shëndetësisë në Gaza tha të hënën se të paktën 38,193 njerëz janë vrarë në luftën midis Izraelit dhe militantëve palestinezë, tashmë në muajin e saj të dhjetë.

Sipas shifrave zyrtare, 87,903 persona të tjerë janë plagosur në Rripin e Gazës që nga fillimi i luftës kur militantët e Hamasit sulmuan Izraelin më 7 tetor 2023, shkruajnë mediat e huaja, përcjell Telegrafi.

Megjithatë, revista mjekësore britanike The Lancet publikoi një raport këtë javë se numri i vërtetë i të vdekurve nga konflikti i Gazës mund të jetë mbi 186,000 – rreth tetë për qind e popullsisë së Gazës.

Të dhënat që viktimat në Gaza mund të arrijnë në 186,000 bazohet në llogaritjen që për çdo person të vrarë drejtpërdrejt nga lufta – katër persona të tjerë do të vdesin indirekt.

Artikulli i Lancet thoshte se “në konfliktet e fundit, numri i vdekjeve indirekte ka lëvizur nga 3 deri në 15 herë më shumë se numri i vdekjeve të drejtpërdrejta”.

“Duke zbatuar një vlerësim konservativ të katër vdekjeve indirekte për një vdekje direkte ndaj 37,396 vdekjeve të raportuara, nuk është e pabesueshme të vlerësohet se deri në 186 000 ose edhe më shumë vdekje mund t’i atribuohen konfliktit aktual në Gaza”.

“Duke përdorur vlerësimin e popullsisë së Rripit të Gazës për vitin 2022 prej 2,375,259, kjo do të përkthehej në shtatë deri në nëntë për qind të popullsisë totale në Rripin e Gazës”.

Ndërsa autoritetet izraelite kanë kundërshtuar shifrat e ministrisë së shëndetësisë së Gazës, shërbimet e inteligjencës izraelite, OKB-ja dhe OBSH-ja i kanë pranuar ato si të sakta, tha The Lancet në raportin e saj.

Sipas revistës, shkatërrimi masiv i infrastrukturës e ka bërë mbledhjen e të dhënave gjithnjë e më të vështirë për ministrinë e shëndetësisë në brezin e shkatërruar nga lufta.

Që nga 10 maji 2024, 30 për qind e 35,091 vdekjeve ishin të paidentifikuara, sipas raportit, por revista paralajmëroi se numri i vdekjeve të raportuara ka të ngjarë të nënvlerësohet.

Autorët e raportit cituan organizatën joqeveritare Airwars e cila ndërmerr vlerësime të hollësishme të incidenteve në Rripin e Gazës.

Sipas raportit, organizata “shpesh zbulon se jo të gjithë emrat e viktimave të identifikueshme janë përfshirë në listën e ministrisë”.

Raporti gjithashtu tha se numri i trupave ende të varrosur nën rrënoja vlerësohet të jetë më shumë se 10,000 pasi 35 për qind e ndërtesave në Rripin e Gazës ishin shkatërruar deri më 29 shkurt 2024, sipas vlerësimeve të OKB-së.

Autorët e raportit kërkuan “një armëpushim të menjëhershëm dhe urgjent në Rripin e Gazës”, si dhe “masa për të mundësuar shpërndarjen e furnizimeve mjekësore, ushqimit, ujit të pastër dhe burimeve të tjera për nevojat bazë njerëzore”. /Telegrafi/