Nuk ka fitues mes Gjilanit dhe Prishtinës – shumë raste, por pa konkretizim

Gjilani dhe Prishtina i kanë ndarë pikët në kuadër të javës së dytë në Albi Mall Superligën e Kosovës, pasi sfida u mbyll pa gola.

Ndeshjen më mirë e nisën bardhëekaltrit, që lëshuan raste të njëpasnjëshme shënimi.

Prishtina mund të kishte përfunduar takimin qysh në pjesën e parë, nëse nuk do t’i shpërdoronte tri shanse të sigurta për lojë.

Pjesa e dytë pati një pamje tjetër, me vendasit që ishin më kërkues.

Qysh në startin e saj, Gjilani lëshoi një rast të qind për qind për gol, me portierin e Prishtinës që bëri një intervenim fantastik.

Në minutën e 75-të të takimit, Erzen Hyseni mendoi se e kishte shënuar golin e fitores, por pas më shumë se tetë minuta, VAR-i bëri të ditur se ishte në pozicion jashtë loje.

Kjo natyrisht se dëshpëroi lojtarët vendas, ndërsa dy skuadrat tentuan deri në fund që të merrnin pikët e plota.

Prishtina aktualisht ka grumbulluar vetëm tri pikë, ndërsa Gjilani ka marrë pikën e parë, ndërsa po ashtu është edhe ndeshja e tyre e parë këtë edicion.

Kryeqytetasit në xhiron e tretë do të përballen me Malishevën, ndërsa gjilanasit do të kenë punë me Feronikelin ’74. /Telegrafi/