Njohësi i çështjeve të emergjencave paralajmëron për rrezikun e zjarreve: Mund të cënohet jeta e qytetarëve të Kosovës

Tahir Ahmeti, njohës i çështjeve të emergjencave dhe njëherësh Drejtor Ekzekutiv i Qendrës Kërkimore për Politika të Sigurisë (SPRC), ka paralajmëruar për rrezikun që mund të shkaktojnë temperaturat e larta në ambient.

Ai ka bërë thirje për kujdes pasi që thotë se një pakujdesi e vogël mund të shkaktojë dëme të mëdha në bujqësi dhe më shumë.

“Këto ditë tek ne kemi temperatura mjaft të larta, nga këto temperatura mund të fillojnë të shfaqen edhe problemet me zjarret pyjore dhe fushore. Një pakujdesi e vogël, qoftë ajo edhe krejtësisht e paqëllimshme, mund të shkaktojë dëme të mëdha në pyje, në toka bujqësore dhe në ambientin në përgjithësi”.

Sipas Ahmetit, rreziku më i madh është për jetën e qytetarëve.

“Sigurisht, më e rëndësishmja është të kuptohet se nga këto zjarre mund të rrezikohet jeta e qytetarëve të Kosovës”.

Njohësi i çështjeve të emergjencave iu ka bërë thirrje institucioneve të Kosovës që të përgatiten për zjarret e mundshme.

“Institucionet emergjente në Kosovë, duhet që të jenë të përgatitura për këto zjarre, qoftë me kapacitete njerëzore dhe logjistike, por edhe me fillimin e fushatave vetëdijesuese për qytetarët, duke i informuar ata, për zjarret e mundshme dhe rrezikun që mund të shkaktojnë ato”, ka deklaruar tutje Ahmeti./Telegrafi/