Njeriu i tetë më i pasur në botë tregon zyrtarisht se a po e blenë Liverpoolin

Zëdhënësi i biznesmenit indian Mukesh Ambani ka ofruar qartësi mbi thashethemet se ai është i interesuar të nisë një ofertë për të blerë Liverpoolin.

Thashethemet erdhën nga mediumi Daily Mirror, e cila pretendoi, nëpërmjet burimeve, se Ambani kishte kërkuar blerjen e klubit.

Ai është kryetar dhe drejtor menaxhues i Reliance Industries, një kompani konglomerate shumëkombëshe që thuhet se ka asete totale prej 220 miliardë eurosh.

Pasuria neto e Ambanit, sipas Forbes, qëndron në 94.3 miliardë euro, gjë që e bënë atë njeriun e tetë më të pasur në botë.

Daily Mirror pretendoi se Ambani, i cili është gjithashtu pronar i ekskluzivitetit të Ligës Premier indiane, Mumbai Indians, ‘do të ishte i përgatitur të derdhte miliona në klub për transferime’.

Futbolli është një treg me rritje të shpejtë në Indi, megjithëse ende mbetet shumë pas kriketit, që është sporti kombëtar i vendit.

Megjithatë, pavarësisht këtyre thashethemeve, zëdhënësi i Ambanit ka dhënë një përgjigje të qartë, por të shkurtër.

Media indiane ABP Live transmeton një deklaratë nga zëdhënësi i kompanisë Reliance Industries, i cili i ka cilësuar raportimet për interesimin e Ambanit që ta blejë Liverpoolin si ‘të rreme’.

Ndërkohë, Liverpool Echo shton se 65-vjeçari nuk është në garë për të blerë Reds dhe ata i janë drejtuar Reliance për koment.

Ndërkohë që Ambani është jashtë garës, megjithatë, blerës të tjerë me sa duket kanë lëvizur dhe synojnë ta blejnë klubin e madh anglez.

Kjo është raportuar nga Daily Mail, të cilët pretendojnë se FSG janë në bisedime me dy blerës të paidentifikuar amerikanë për marrjen e plotë të klubit.

Thuhet se FSG kërkon afro katër miliardë funte për të shitur Reds. Kjo do të ishte një vlerë shumë më e ulët se 4.5 miliardë euro që ka paguar Todd Boehly me bashkëpronarët e tjerë për të blerë Chelsean nga Roman Abramovich.

Kjo ishte shitja më e shtrenjtë e një klubi sportiv në histori, me çdo shitje të Liverpoolit që duket se nuk ka gjasa të arrijë ato lartësi pasi ata potencialisht hyjnë në një epokë të re. /Telegrafi/