Njëmbëdhjetë të famshmit që ndihmuan nga pasuria e tyre për raste të ndryshme në botë përgjatë vitit 2022

Vitin që lamë pas, të famshëm në botë të fushës së modës, aktrimit, muzikës dhe madje edhe sportit luftarak kanë të gjithë një gjë të përbashkët: ata kanë përdorur kohën dhe paratë e tyre për të përhapur pak gëzim.

Disa nga gjestet e tyre kanë qenë të vogla, të tilla si shpërndarja e parave për personat e papunë, tjerat kanë arritur në miliona euro, ndërsa të tjerë kanë qenë të gatshëm për të ndihmuar njerëz apo fëmijë të sëmurë rëndë.

Të gjithë, megjithatë, ishin të rëndësishëm për ndjenjën e komunitetit që ata inkurajuan.

Më poshtë ua sjellim një vështrim të personazheve të famshëm që kanë ndihmuar të tjerët gjatë gjithë vitit 2022:

Gigi Hadid

Në mars, modelja amerikane, e cila është me origjinë holandeze-palestineze, u zotua të dhurojë të ardhurat e saj nga Java e Modës në Paris për të ndihmuar viktimat e luftës në Ukrainë si dhe për Palestinën.

Duke punuar gjatë shfaqjeve “Vjeshtë/Dimër 2022” që u zhvilluan në Paris në shkurt, Hadid bëri një postim në rrjetet sociale për të shpjeguar zhgënjimin e saj për lidhjen me kohën për të cilën kishin rënë dakord muaj më parë.

“Të kesh një orar të caktuar të muajit të modës do të thotë që kolegët e mi dhe unë shpesh prezantojmë koleksione të reja të modës gjatë periudhave zemërthyese dhe traumatike në histori”, shkroi ajo.

Edhe pse kjo periudhë ishte jashtë duarve të saj, modelja shpjegoi se ishte në gjendje të kontribuonte drejt çështjeve më të gjera që ndodhin në mbarë botën.

“Ne nuk kemi kontroll mbi shumicën e orareve tona të punës, por do të donim të ecnim ‘për’ diçka. Po zotoj të dhuroj të ardhurat e mia nga shfaqjet e vjeshtës 2022 për të ndihmuar popullin në Ukrainë, si dhe për të vazhduar të mbështes ata që përjetojnë të njëjtën gjë në Palestinë”.

John Cena

Mundësi, i kthyer në aktor, John Cena, tashmë është zyrtarisht personi i famshëm që ka plotësuar më shumë dëshira për Fondacionin “Make-a-Wish”, pasi bëri paraqitjen e tij të 650-të në qershor për fëmijët e sëmurë. Kjo do të thotë se ai është ylli më bujar që ka kaluar kohë me fëmijët në spital.

I themeluar në vitin 1980, Fondacioni “Make-a-Wish” ndihmon fëmijët e sëmurë duke ia plotësuar ato që i përshkruan si “dëshira magjike”.

Nëpërmjet fondacionit, fëmijët mund të kërkojnë të takojnë një personalitet sportiv, yll filmi ose personazh të famshëm. Një figurë shumë e kërkuar, Cena ka hequr dorë nga orët e panumërta të kohës së tij për të kaluar kohë me qindra fëmijë të sëmurë pa asnjë arsye tjetër veçse për t’u sjellë atyre pak gëzim.

Lizzo

Në qershor, pas vendimit të Gjykatës së Lartë të ShBA-së për të përmbysur “Roe vs Wade”, këngëtarja Lizzo njoftoi se do të bënte një donacion për të mbështetur lirinë e të drejtave riprodhuese.

Mbështetëse e pozitivitetit të trupit dhe të drejtës së individëve për liri nga paragjykimet, këngëtarja veproi shpejt, duke investuar gjysmë milionë euro për të mbështetur autonominë e trupit të grave.

Vetëm disa ditë pas vendimit historik, këngëtarja e “Juice” shkroi në Twitter: “Unë jam duke premtuar 500 mijë euro nga turneu im i ardhshëm në Planned Parenthood”.

Më pas ajo tha se kjo shumë do të krahasohej me Live Nation, kompania që prodhon turneun e saj botëror, dhe së bashku do të çojnë donacionin total në një shumë mbresëlënëse një milion euro.

Dave Chappelle

Në qershor, komediani Dave Chappelle doli në një shfaqje të minutës së fundit në Buffalo, New York, vetëm një muaj pasi të shtënat masive me motive racore vranë dhjetë persona dhe lanë tre të tjerë të plagosur.

Gjatë shfaqjes së tij në Qendrën e Arteve Performuese “Shea”, ai njoftoi audiencën se do të dhuronte shitjet e biletave për familjet e prekura.

Duke folur për vendimin, Kevin Sweeney, drejtor i marketingut dhe komunikimit në Qendrën e Arteve Performuese “Shea”, i tha Entertainment Tonight se Chappelle e kishte bërë njoftimin në skenë.

“Ai tha dhe unë po parafrazoj, ‘Kam ardhur këtu në Buffalo për të njohur viktimat dhe për këto familje'”.

Në mesin e të pranishmëve në vendin me 3019 ulëse ishin familjarët e viktimave, të cilët u ftuan personalisht nga Chappelle.

Tom Brady

Në shtator, qendërmbrojtësi i Tampa Bay Buccaneers bëri një donacion për të ndihmuar të prekurit nga uragani Ian.

Është pranuar të jetë uragani më i madh dhe më shkatërrues i kategorisë 4 që ka goditur Floridan që nga viti 1935.

“Të lumtur që jemi në gjendje të shkojmë në shtëpi të dielën mbrëma, por shumë njerëz në Florida nuk do të jenë në gjendje ta bëjnë të njëjtën gjë”, shkroi Brady në Twitter.

Përveç gjestit të tij, ai shpresonte se Liga Kombëtare e Futbollit dhe lojtarët e tjerë do të përfshiheshin gjithashtu, duke shkruar: “Unë do të bëj një donacion për Floridan dhe shpresoj që pjesa tjetër, NFL do të ndjekë shembullin”.

Dik Van Dyke

Aktori, 97 vjeç, vërtetoi se mirësia nuk ka kufi moshe, kur në tetor u shpërndau kartëmonedha pesë dollarëshe atyre në Malibu Community Labor Exchange, një organizatë jofitimprurëse që i ndihmon njerëzit të gjejnë punë.

Aktori shpërndau para për të kujtuar se edhe shumat e vogla mund të bëjnë ndryshim në ditën e dikujt.

Duke folur për Entertainment Tonight, artisti bëri shaka duke thënë se po aq sa i pëlqente të ndihmonte të tjerët, ai “nuk mund ta bëjë këtë gjatë gjithë kohës”.

Hakim Ziyech

Futbollisti maroken, Hakim Ziyech, i cili ndihmoi vendin e tij në një paraqitje historike në gjysmëfinale në Kupën e Botës në Katar, ka dhuruar të gjitha të ardhurat e tij.

Si kombi i parë afrikan që arriti në katërshen finale, Ziyech, 29 vjeç, fitoi një bonus prej 260 mijë eurosh, të cilin më pas e dhuroi për bamirësi në të gjithë Marokun.

I nënshkruar me Chelsean, Ziyech fiton gjashtë milionë euro në vit dhe më parë ka një histori të shpërndarjes së bonuseve të tij midis stafit të ekipit dhe atyre në nevojë.

Në të gjithë Marokun, ai tashmë ka ndihmuar në mbështetjen e shumë klubeve të futbollit si dhe ka dhuruar para për spitalet.

Dwayne Johnson

Për të shënuar sezonin e festave, Johnson ka ndihmuar në përhapjen e një gëzimi të vogël për një pjesë të rëndësishme në ShBA.

Nëpërmjet një iniciative të kompanisë së tij “Teremana”, një autobus i lëvizshëm i furnizimit me ushqim i quajtur “Mana Mobile” ka udhëtuar në të gjithë vendin për të ofruar ushqim dhe pije falas për policinë, zjarrfikësit dhe mjekët.

Deri më sot, u ka dhuruar 22 mijë njerëzve një vakt me shpresën për ta rritur atë numër përpara se të përfundojë viti.

“Ne u kemi shërbyer tashmë 22 mijë njerëzve dhe synojmë të shërbejmë edhe 10 mijë të tjerë”, tha aktori në një postim.

Blake Lively dhe Ryan Reynolds

Blake Likely dhe bashkëshorti i saj, Ryan Reynolds, kanë qenë ndër të parët që ndihmuan popullin ukrainas pas pushtimit rus në muajin shkurt.

Ata bashkëpunuan me agjencinë e OKB-së për Refugjatët në ShBA, teksa njoftuan se do të dhurojnë një milion euro.

“Kur të dhuroni, ne do ta krahasojmë atë deri në një milion euro duke krijuar mbështetjen e dyfishtë”, deklaruan çifti.

Lively vlerësoi gjithashtu punën e UNHCR-së, duke shpjeguar se ishte në terren “duke ndihmuar mbi 50 mijë ukrainasit që duhej të largoheshin nga shtëpitë e tyre” dhe shpjegoi se si organizata “po ofronte ndihmë për shpëtimin e jetës dhe gjithashtu po punonte me vendet fqinje për të siguruar mbrojtje për këto familje”.

Mila Kunis

Një tjetër emër që ndihmoi në mbledhjen e fondeve për Ukrainën është aktorja Mila Kunis. Ajo nisi një fushatë për mbledhjen e fondeve, ku tregoi pse ishte kaq e rëndësishme për të që të jepte mbështetjen e saj.

“Edhe pse familja ime erdhi në Shtetet e Bashkuara të Amerikës në vitin 1991, unë kam lindur në Chernivtsi, Ukrainë në 1983”, shkroi ajo. “Ukrainasit janë njerëz krenarë dhe të guximshëm që meritojnë ndihmën tonë në kohën e tyre të nevojës. Ky sulm i padrejtë ndaj Ukrainës dhe popullit në përgjithësi është shkatërrues dhe ata kanë nevojë për mbështetjen tonë. Familja jonë po fillon këtë fond për të ndihmuar në ofrimin e mbështetjes së menjëhershme dhe ne do të sigurojmë deri në tre milionë euro”.

Me bashkëshortin e saj, Ashton Kutcher, çifti u përpoq të mblidhte 30 milionë euro, megjithatë, fondi e kaloi atë duke mbledhur një total prej 38 milionë eurosh.

Lil Baby

Ylli i hip-hopit, Lil Baby, vazhdon të ndihmojë në mbështetjen e komunitetit ku ai u rrit. Për tre vitet e fundit, reperi ka organizuar një festë “Back to School” për fëmijët e Atlantas, Georgias, si një ditë argëtuese për të rinjtë.

Me prejardhje nga një zonë e varfër, këngëtari ka bërë muzikë, lojëra dhe madje edhe shëtitje karnavalesh për fëmijët vendas për t’i shijuar pa pagesë.

Përveç kësaj, eventi gjithashtu ofron gjëra elementare për familjet në vështirësi, të tilla si mjete shkollore, çanta shpine dhe madje edhe prerje flokësh për fëmijët që nuk kanë kushte.

Deri më sot, më shumë se tre fëmijë kanë përfituar nga ky eveniment. Ngjarja e këtij viti është lidhur zyrtarisht me “Goodr”, një organizatë jofitimprurëse që ofron ushqime falas për çdo fëmijë, familje dhe të moshuar që kanë nevojë për mbështetje. /Telegrafi/