Një shpërthim i fuqishëm në qytetin rus Belgorod, ka krijuar një krater me diametër prej 20 metrave në oborrin e një objekti.
Guvernatori i Belgorodit, Vyacheslav Gladkov, ka konfirmuar incidentin duke mos treguar shkakun që e shkaktoi shpërthimin.
Sky News shkruan se Gladkov ka shpallur gjendjen e jashtëzakonshme, transmeton Telegrafi.
“Kryetari Valentin Demidov, shefi rajonal për siguri Yevgeny Vorblov dhe të gjithë punonjësit e ndihmës së shpejtë kanë dalë në vendin e ngjarjes”, ka shkruar Gladkov në Telegram – duke premtuar se më vonë do të japë detaje.
Nga shpërthimi janë dëmtuar disa vetura, e një prej tyre ka “fluturuar” në kulmin e një shtëpie.
Banorët lokale kanë bërë të ditur se para se të dëgjonin një fishkëllime e fuqishme, është parë një objekt i paidentifikuar që u rrëzua dhe shpërtheu.
Belgorodi gjendet në afërsi të kufirit me Ukrainë, dhe është një prej rajoneve që forcat ukrainase vazhdimisht tentojnë ta godasin. /Telegrafi/
