Një burrë nga Detroiti tha se fillimisht mendoi se po bënin shaka kur zbuloi se kishte fituar një çmim lotarie prej 25,000 dollarësh në vit për gjithë jetën.
Micale Garland u tha zyrtarëve të Lotarisë së Miçiganit se e bleu biletën e tij për shortin e 28 prillit Lucky for Life në internet, përcjell Telegrafi.
"Kam luajtur Lucky For Life për disa vite dhe gjithmonë i blej biletat e mia në internet", tha Garland.
"Kur pashë emailin nga lotaria për marrjen e një çmimi, hyra në llogarinë time dhe mendova se po bënin shaka kur pashë bilancin e llogarisë sime. Vetëm kur telefonova lotarinë dhe konfirmova çmimin me ta, besova se kisha fituar vërtet. Ende ndihem sikur po jetoj në një ëndërr!".
Garland tha se disa nga fitimet e tij do të shkojnë për të bërë një udhëtim dhe pjesa tjetër do të shkojë në kursime. /Telegrafi/
