Një 11-vjeçare martohet me një 22-vjeçar në Iran – pas publikimit të pamjeve, anulohet martesa

Një video që tregon një vajzë 11-vjeçare duke u martuar me kushëririn e saj 22-vjeçar në Iranin rural ka tërhequr vëmendjen e re për një praktikë për të cilën shumë iranianë besojnë se është në rënie.

Megjithatë, sipas mediave të huaja, përcjell Telegrafi, martesa për fëmijë është ende e zakonshme në disa zona rurale.

Videoja thuhet se tregon një martesë të ndodhur më 26 gusht në Bahmaei, një rreth i varfër në krahinën juglindore të Kohgiluyeh dhe Boyer-Ahmad. Nusja dhe dhëndri janë parë të ulur pranë njëri-tjetrit dhe përqafohen.

Familjet e tyre shikojnë se si një udhëheqës fetar zhvillon ceremoninë, duke deklaruar në një pikë se dhëndri do të paguajë “mahr” tradicional për dorën e nuses së tij, “14 monedha ari dhe para, ekuivalent me një total prej 9000 euro.

Udhëheqësi fetar e pyet nusen: “Fatime, a pranon të martohesh me Milad Jashanin?” dhe nusja përgjigjet: “Me lejen e prindërve të mi, po”. Dhëndri thotë: “Po, edhe unë”, dhe ata bëhen burrë e grua ndërsa duartrokiten nga familjet e tyre.

Pamjet thuhet se janë filmuar më 26 gusht 2019 në provincën Kohgiluyeh dhe Boyer-Ahmad të Iranit, ku shihet një vajzë 11-vjeçare duke u martuar me kushëririn e saj, i cili është 22 vjeç.

Neni 1041 i Kodit Civil të Iranit cakton moshën e martesës në 13 vjeç për vajzat dhe 15 për djemtë – nëse ata kanë pëlqimin e prindërve të tyre.

Por nëse familjet duan të martojnë një vajzë e cila është 12 ose më e re – ose një djalë 14 ose më i ri – ata mund të kërkojnë nga një gjykatës t’i deklarojë ata “intelektualisht të pjekur” për martesë.

Sipas statistikave zyrtare, në 5.5 për qind të martesave iraniane, nuset janë nën 15 vjeç.

Pamjet, të postuara në mediat sociale më 1 shtator dhe të shfaqura në televizionin shtetëror, shkaktuan zemërim të gjerë.

Kështu, dy ditë më vonë, prokurori publik anuloi martesën, për të cilën familjarët kanë thënë se do ta “ribëjnë” në kohën e duhur. /Telegrafi/