Nis fushata zgjedhore – LDK dhe AAK deklarohen për pesë ditë fushatë, LVV dhe PDK pa qëndrim zyrtar

Sot ka nisur zyrtarisht periudha e fushatës zgjedhore për zgjedhjet lokale të 17 tetorit, ku me kalendarin e Komisionit Qendror të Zgjedhjeve  fushata zgjedhore fillon më 16 shtator dhe përfundon më 15 tetor.

Por për shkak të situatës me pandeminë disa nga partitë politike janë shprehur për shkurtimin e periudhës së fushatës.

Lumir Abdixhiku, kryetar i Lidhjes Demokratike të Kosovës ditë më parë u kishte dërguar një letër kryetarëve të partive parlamentare, ku për shkak të situatës me pandeminë kishte propozuar fushata të reduktohet në 10 ditë.

Kryetari i Partisë Demokratike të Kosovës, Memli Krasniqi kishte thënë se shkurtimi i fushatës zgjedhore duhet të trajtohet dhe të merret vendim.

Ndërkaq, kryetari i Aleancës për Ardhmërinë e Kosovës, Ramush Haradinaj kishte thënë se fushata zgjedhore duhet të shkurtohet edhe më shumë, vetëm në pesë ditë.

Deri tani zyrtarisht, LDK dhe AKK zyrtarisht janë deklaruar pro shkurtimit të fushatës në pesë ditë.

Lexo po ashtu Fushata zgjedhore, IKSHPK bën thirrje për ndalimin e aktiviteteve publike dhe grumbullimin e qytetarëve

“Në mbledhjen e mbajtur Kryesia e LDK-së, duke marrë për bazë gjendjen e rëndë shëndetësore në vend, gjendje e shkaktuar për shkak të keqmenaxhimit pandemik e të paprecedentë, vendosi që në mënyrë krejtësisht vullnetare, fushata konvencionale zgjedhore të shkurtohet nga 30 ditë në vetëm 5 ditë; me mundësi që, varësisht nga gjendja pandemike të mos mbahet fare. Fushata, ndërsa, do të mbahet vetëm në formë digjitale dhe në tubime duke i respektuar në përpikëri rregullativën në vend mbi tubimet publike”, thuhej në deklaratën e LDK-së.

Ndërkaq, shkurtimin e fushatës në vetëm pesë e ka njoftuar të mërkurën edhe kryetari i AAK-së.

Haradinaj ka bërë të ditur se duke pasur parasysh situatën e rëndë epidemiologjike me COVID-19, AAK ka vendosur që fushatën konvencionale për zgjedhjet lokale ta kufizojë në pesë ditë.

Haradinaj në një postim në Facebook shkruan se edhe fushatën pesë ditore do të zhvillojnë në përputhje të plotë me rekomandimet për parandalimin e përhapjes së virusit.

“Duke pasur parasysh situatën e rëndë epidemiologjike me Covid-19, Aleanca për Ardhmërinë e Kosovës, ka vendosur që Fushatën konvencionale për zgjedhjet lokale Tetor 2021, ta kufizojë në 5 ditë. Poashtu jemi të përcaktuar që edhe këtë afat 5 ditor të fushatës, ta zhvillojmë në përputhje të plotë me kriteret dhe rekomandimet për parandalimin e përhapjes së virusit. Do të përpiqemi që të gjejmë mënyra alternative të komunikimit dhe të shpalosim programin dhe objektivat tona për zgjedhjet e 17 tetorit.  Gjatë kësaj kohe do ta zbatojmë modelin e fushatës digjitale”, theksoi ai.

Ndërkaq, shefi i Zyrës për komunikim në Vetëvendosje, Arlind Manxhuka tha për Telegrafin se për këtë kanë dhënë qëndrim ditë më parë dhe se gjatë fushatës do t’i respektojnë me përpikëri udhëzimet e institucioneve shëndetësore, por pa saktësuar sa ditë.

“Ne e dhamë qëndrimin tonë ditë më parë në lidhje me procesin zgjedhor, edhe për shkak të variantit Delta e edhe evitimit të një vale të re, mirëpo ndodhi si ndodhi. Ne do të respektojmë në përpikëri udhëzimet e vendimet e institucioneve të vendit, veçanërisht atyre të shëndetësisë”.

Ndërkaq, kryetari i PDK-së, Memli Krasniqi, kishte deklaruar se si parti politike janë shprehur se fushata zgjedhore mund të mbahet në vetëm pak ditë apo edhe në anulim të gjithë fushatës, megjithatë nuk ka pasur vendim se në çfarë periudhe do ta mbajnë. /Telegrafi/