Nicolas Sarkozy dënohet me një vit burg

Gjykata e Apelit dënoi ish-presidentin francez, Nicolas Sarkozy me një vit burg, por vetëm gjashtë muaj do t’i kalojë prapa grilave për aferën e shpenzimeve të tepërta gjatë fushatës së humbur presidenciale në vitin 2012.

Avokati i Sarkozyt tha menjëherë se ish-presidenti do të apelojë vendimin në Gjykatën e Kasacionit, gjykatën më të lartë në vend.

Sarkozy, kreu i shtetit midis viteve 2007-2012, arriti në gjykatë duke buzëqeshur, dëgjoi vendimin dhe më pas u largua nga salla e gjyqit pa thënë ndonjë fjalë, shkruan politico.

“Z. Nicolas Sarkozy është plotësisht i pafajshëm, ai e mori parasysh këtë vendim dhe vendosi të ankohet në Gjykatën e Kasacionit”. Prandaj ai vazhdon luftën në këtë rast”, tha avokati i Sarkozy, Vincent Desry.

Në muajin shtator të vitit 2021, një gjykatë penale në Paris e shpalli 69-vjeçarin fajtor për tejkalim të madh të kufirit ligjor për shpenzimet zgjedhore dhe e dënoi atë me një vit burg për financim të paligjshëm të fushatës. Më pas gjykata kërkoi menjëherë ndryshimin e dënimit me burg në arrest shtëpie nën monitorim elektronik.

Së bashku me Sarkozyn u dënuan edhe nëntë persona të tjerë, të cilët gjithashtu apeluan vendimin e gjykatës së shkallës së parë.

Në atë rast, hetimi zbuloi se ishte krijuar një sistem i faturave të dyfishta për të mbuluar shpenzimet gjatë fushatës presidenciale kur u shpenzuan pothuajse 43 milionë euro, ndërsa kufiri maksimal i lejuar ishte 22.5 milionë euro.

Në vendimin e saj, gjykata penale nënvizoi se ish-presidenti “vazhdoi të organizonte” mitingje elektorale edhe pse ishte paralajmëruar me shkrim për rrezikun e tejkalimit të kufirit ligjor të financimit të fushatës.

Gjatë procesit të ankimimit, prokurorët kërkuan një vit burg për Sarkozy, por këtë herë me kusht.

Ashtu si gjatë gjykimit të shkallës së parë, Sarkozy kundërshtoi me forcë çdo përgjegjësi penale dhe tha se këto ishin “përralla” dhe “gënjeshtra”.

Kujtojmë se në muajin maj të vitit të kaluar, ai u dënua për rastin e përgjimeve me tre vite burg, një prej të cilëve me kusht. Ai e apeloi dënimin në Gjykatën e Kasacionit.

Sarkozy do të jetë sërish në gjykatë në vitin 2025 me dyshimin se libianët financuan fushatën e tij presidenciale në vitin 2007. /Telegrafi/