Ngritja e temperaturave, doktoreshë Drita Gashi-Peqani jep këshilla si duhet kujdesur për shëndetin (Video)

Muaji korrik, ka hyrë me ngritje të temperaturave në Kosovë. E kjo ka ndikuar në përkeqësimin e personave që janë në moshë të shtyrë dhe atyre që vuajnë nga sëmundjet kronike.

Doktoreshë Drita Peqani – Gashi, në një prononcim për Telegrafin, ka folur se si duhet të kujdesemi për shëndetin gjatë ditëve të nxehta, kur temperatura arrijnë kulmin.

Gashi ka thënë se ngritja e temperaturave ndikon keq te personat që vuajnë nga sëmundjet të mushkërive, sëmundjet reumatike, alergjitë e ndryshme, diabet, etj.

Ajo ka theksuar se numri i personave që kërkojnë ndihmë gjatë këtyre ditëve është rritur por jo shumë, për arsye se ka si duket një vetëdijesim të qytetarëve në raport me shëndetin e tyre.

Më tutje doktoresha ka porositur që personat që rrezikohen për shëndetin e tyre nga temperaturat e larta, t’i reduktojnë daljet në orët e pikut, nga ora 10:00 – 11:00, deri në ora 16:00 – 17:00.

“Nëse e kanë patjetër të dalin, atëherë të kenë kujdes më veshjen e tyre. Të veshin rroba me ngjyra të hapura. Të bartin kapela, syze, etj. Një pjesë tjetër e rëndësishme gjatë këtyre ditëve është kujdesi për ushqimin dhe pijet. Duhet t’i largohen ushqimeve me shumë kalori dhe yndyrëra, dhe të konsumojnë së paku 2 deri në 2.5 litra”, ka sqaruar Peqani – Gashi. /Telegrafi/