Ngrihet aktakuzë ndaj arsimtarit në Gjakovë për dhunim ndaj një të mituri

Prokuroria në Gjakovë ka ngritur aktakuzë ndaj një mësimdhënësi 58-vjeçar për dhunim. Ai akuzohet se ka tentuar ta dhunojë një djalë të mitur, që më parë kishte qenë nxënës i tij. Rasti ka ndodhur në maj të këtij viti.

Një mësimdhënës në komunën e Gjakovës po pretendohet nga Prokuroria Themelore në këtë qytet, se është përfshirë në një rast të rëndë dhunimi ndaj një të mituri.

Për këtë çështje, Prokuroria e Gjakovës para pak ditësh ka ngritur aktakuzë ndaj mësimdhënësit me inicialet Xh.S.

Sipas aktakuzës, të cilën e ka siguruar RTV Dkuagjini, ditën kritike Xh.S e kishte kontaktuar të miturin përmes rrjeteve sociale, duke i kërkuar ndihmë për bartjen e disa drunjëve.

Të dy ishin takuar në një pikë derivatesh.

Lexo po ashtu Vazhdon përplasja ndërinstitucionale për dhunimet, Ministria e Drejtësisë- Këshillit Prokurorial: S’do të heshtim ndaj performancës së dobët

Aty, sipas aktakuzës, 58 -vjeçari e kishte futur në veturë viktimën, ia kishte mbyllur dyert dhe ishte nisur në drejtim të pjesës së pasme të fabrikës së metalit.

Në këtë vend, i akuzuari kishte provuar të kryente marrëdhënie intime me djalin e mitur, duke i shkaktuar atij dëmtime në organet gjenitale.

“Prokuroria Themelore e Gjakovës ka ngritur aktakuzë ndaj të pandehurit me inicialet Xh.S, nën dyshimin e bazuar se ka kryer veprën penale dhunimi. Prokurori i shtetit i ka propozuar Gjykatës kompetente që i pandehuri të dënohet sipas ligjit për veprën penale e cila i vihet në barrë. Gjithashtu, së shpejti do të mbahet edhe seanca fillestare ndaj të akuzuarit”, ka thënë Yllka Juniku Shehu – zëdhënëse e Prokurorisë së Gjakovës.

Seanca për këtë rast do të mbahet më 21 shtator.

Xh.S është një mësimdhënës me përvojë në rajonin e Gjakovës, përderisa prej ditës së arrestimit, ai po qëndron në paraburgim.