Sipas grupeve të monitorimit të internetit, Turqia ka bllokuar qasjet në mediat sociale pasi një sulm ajror që vrau të paktën 33 ushtarë turq në Idlib të Sirisë.

Sipas mediave të huaja përcjell Telegrafi, të dhënat nga vëzhgimi i internetit “NetBlocks” tregojnë se Twitter, Facebook dhe Instagram u bënë të pa qasshme në orën 10:30 në mbrëmjen e së enjtes, në ofruesin kombëtar “Turk Telecom”, dhe më pas u bllokuan edhe ofruesit e tjerë kryesor të shërbimeve.

“Të dhënat tregojnë se serverët e YouTube dhe WhatsApp, ishin të bllokuara gjithashtu pjesërisht”, tha një përgjegjës në NetBlocks.

“Kufizimet janë në përputhje me teknikat e përdorura për të filtruar përmbajtjen në Turqi, me filtra.  Server Name Indication dhe Domain Name System”, ka shtuar ai.

Sulmi ajror që vrau 33 ushtarë turq, ishte numri më i madh i vdekjeve për Turqinë në një ditë të vetme, që kur ndërhyri për herë të parë në Siri në vitin 2016. /Telegrafi/