Një shpërthim i fuqishëm që ka ndodhur në qendër të Nashville, ka bërë që një ndërtesë të shembet dhe të dëmtojë disa tjera – duke detyruar autoritetet përkatëse të urdhërojnë evakuimin.

Shefi i policisë ka thënë se një kamion i parkuar ka shpërthyer të premten, duke dëmtuar disa ndërtesa në afërsi të tij, transmeton Telegrafi.

Jason Stin, redaktor i ueb-faqes Scoop Nashville, ka shkruar në Twitter se një ndërtesë është shembur nga shpërthimi i fuqishëm.

Madje ka bërë të ditur se zjarrfikësit po tërhiqen pas incidentit, dhe se gjithçka përreth është bllokuar për shkaqe sigurie.

“Në qendër të qytetit është një zjarr i madh – po vazhdon kërkimi i viktimave, disa persona kanë arritur të zbresin nga katet e sipërme”, ka shkruar Stin në Twitter, duke shtuar se shumica e personave kanë pësuar lëndime të lehta trupore. /Telegrafi/