Ngjyra që sjell ngrohtësinë e diellit dhe sharm klasik po bëhet trendi kryesor i stinës
Nëse ekziston një ngjyrë flokësh që këtë shtator po mbizotëron në Instagram, TikTok dhe pasarelat e modës, ajo është lemon platinum.
Ky ton joshës e plot gjallëri është si një rreze dielli e kapur në fije flokësh – i përsosur për të gjitha ato që duan të hyjnë në vjeshtë me shkëlqimin e verës.
Emrin ia ka vënë stilisti i njohur i flokëve Tom Smith, dhe e përshkruan si një version më të ngrohtë e më të lumtur të platinës klasike, pa tonet e akullta gri, por me një prekje të lehtë të së verdhës limon.
Mendoni për Kirsten Dunst, Anya Taylor-Joy, legjendaren Claudia Schiffer apo të paharrueshmen Carolyn Bessette Kennedy, të gjitha ato reflektojnë një energji retro sofistikuese, dhe kjo ngjyrë u përshtatet në mënyrë të përkryer, transmeton Telegrafi.
Prej vitesh, platinumi i ftohtë “frozen” ka qenë objektivi kryesor i biondeve, por trendet janë zhvendosur drejt nuancave më të buta, më të ngrohta, “buttery”, që i shkojnë për shtat nuancave të ndryshme të lëkurës dhe i japin flokut një shkëlqim luksoz, gati vintage. Këtë sezon, ngrohtësia e ngjyrës nuk është më një efekt i padëshiruar, ajo është vetë deklarata.
Stilistja e famshme Jenna Perry (e cila e bëri Kendall Jenner bionde) e adhuron këtë stil sepse i jep gjallëri flokut dhe nuk e lodh atë. Lajmi i mirë? Nëse tashmë jeni bionde, ky efekt mund të arrihet edhe pa zbardhje agresive.
Si ta kërkoni këtë ngjyrë në sallon?
I thoni frizerit: “Dua një bionde shumë të çelët, të pastër, me një nën-ton të lehtë limoni - jo të artë, jo karamel, dhe assesi hiri”. Qëllimi është - jo një bionde e ftohtë klasike.
Pse nuk duhet të frikësoheni nga toni i verdhë?
Në këtë version, toni i verdhë është plotësisht i kontrolluar dhe i qëllimshëm, i jep flokut gjallëri dhe thellësi, në vend që të duket si një gabim teknik.
Mirëmbajtja
▪ Përdorni shampon pastrues që ngjyra të mbetet e kthjellët dhe e freskët.
▪ Shmangni kripën dhe klorin sa zgjat sezoni i notit, ato mund të zbehin këtë nuancë të ndritshme.
Lemon platinum është një ngjyrë e guximshme, moderne dhe pak koketë, që njëkohësisht bart shpirtin e verës dhe luksin e vjeshtës.
Me pak fjalë, perfekte për të gjitha ato që duan që flokët e tyre të duken sikur kanë dalë nga një editorial mode, e jo thjesht nga salloni. /Telegrafi/
