Nëntori, muaji i gjykimeve të “nxehta” në Maqedoni

Procesi gjyqësor për “Lagjen e Trimave”, para përmbushjes së dy viteve nga ngritja e aktakuzës, në fillim të muaji nëntor pritet të marrë fund, shkruan gazeta KOHA.

Caktimin e miratimit të aktgjykimit, Gjykata Penale e Shkupit për këtë lëndë e ka paraparë ta kumtojë me datë 2 nëntor. Lënda gjyqësor për ngjarjet e Kumanovës, që ndodhën në prill dhe maj të vitit 2015, para Këshillit Penal, në kryer me gjykatësen Verka Petrovska, është proceduar për gati dy vite. Gjatë kësaj periudhe, pala mbrojtëse, prokuroria dhe vetë të akuzuarit, shpalosën fakte dhe argumente të ndryshme. Megjithatë, Trupi gjykues në një asnjë moment të këtij procesi gjyqësor nuk arriti të kuptojë dhe merr përgjigje nga të akuzuarit se kush në realitet e ftoi grupin nga Kosova që përmes kalimit ilegale të kufirit të futet me armatim në Maqedoni.

Nën akuzën e njëjtë, përfshi edhe sulmin në Karakollin e Gushincës, me datë 3 nëntor Gjykata Penale e Shkupit duhet t’ia caktojë dënimin edhe të akuzuarit Sulejman Osmani. Për dallim nga 37 të akuzuarit tjerë për ngjarjet e Kumanovës, procesi gjyqësor ndaj Sulës është zhvilluar ndarës. Arsyeja se pse Sulejman Osmani nuk mundej të gjykohet me anëtarët tjerë të grupit, siç tha në disa raste gjykatësja Verka Petrovska, ishte për shkak rrezikut që ky proces të fillonte nga e para, gjegjësisht në këtë mënyrë aktgjykimi nuk do të miratohej në afatin e paraparë ligjor. Prej datës 9 shkurtë 2016, kur edhe zyrtarisht filloi gjykimi kundër grupit të Kumanovës, e deri në mesin e shtatori të këtij viti, ky proces gjyqësor ka pësuar disa ndryshme. Përveç bashkimit të lëndës gjyqësor “Rrufeja” (grupi i logjistikës sipas Prokurorisë), aktakuza për “Lagjen e Trimave” ka pësuar ndryshime edhe në drejtim të akuzave për organizatorët e grupit, respektivisht me këtë rast Sami Ukshini dhe Demë Shehu, u përjashtuan nga akuza se kanë qenë liderë të grupit.

Seancë tjetër gjyqësor e caktuar për 2 nëntor pritet të mbahet edhe për rastin “Fortesa2”, lëndë kjo e iniciuar nga Prokuroria Speciale Publike, e që lidhet me shkatërrimin e dokumentacionit dhe pajisjeve për përgjimet. Në këtë proces gjyqësor, si të akuzuar kryesor llogaritet ish dyshja e Drejtorisë së Pestë në polici, Goran Grujoski dhe Nikolla Boshkovski, të cilët për momentin qëndrojnë në burgun e ekstradimit në Selanik. Krahas kësaj lëndë, prokurorët special në GJPSH, gjatë muajit nëntor pritet të paraqiten më shpesh, pasi që me datë 6 nëntor është caktuar seanca gjyqësor për rastin “Transportuesi”. Kjo aktakuzë e ngritur nga PSP-ja, ka të bëje me veprime kriminele gjatë transportit të nxënësve në qytetin e Manastirit, ku si i akuzuar i parë cilësohet ish kryetari i kësaj komune Vlladimir Taleski dhe 20 të akuzuar tjerë. Për herë të parë që kur është ngritur aktakuza me 7 nëntor para Trupit gjykues, pritet të paraqitet edhe afaristi Sead Koçan, i cili nga PSP-ja hetohet si i akuzuar kryesor në rastin “Trust”, me çka siç thuhet në aktakuzë pronari i TV “Nova” ka keqpërdorur 15 milionë para nga arka e shtetit.

Njëkohësisht me 15 nëntori pritet të filloi edhe gjykimi për rastin “Treqind”, në të cilën i akuzuar i parë është ish ndihmës ministri i punëve të brendshme, Gjoko Popovski. Akuzat ndaj këtij ish funksionari kanë të bëjnë me mënyrën e jashtëligjshme të furnizimit me automjete për nevojat e policisë së shtetit. Gjykim tjetër i caktuar për muajin nëntor është për rastin “Shuplakat”. Seanca gjyqësore kundër të akuzuarit të parë në këtë lëndë, ish kryeministrin Nikolla Gruevskin, pritet të mbahet me 20 nëntor. Dhe, gjykimi i fundit i “nxehtët” që pritet të mbahet në GJPSH, brenda muajit nëntor është për rastin “Sopoti”. Prokurori special, Burim Rustemi, në seancën e fundit parashtroi prova shtesë për këtë rast, me çka pala mbrojtëse kërkoi kohë për t’i shqyrtuar dhe Trupi gjykues vendosi që me 23 nëntor të vazhdoj gjykimi për rastin Sopoti.