Ndërsa Trump është betuar, Macron paralajmëron Evropën se nuk mund të varet vetëm nga armët amerikane

Presidenti francez Emmanuel Macron paralajmëroi të hënën se miliarda euro të parave të taksapaguesve të shpenzuara në buxhetet ushtarake të Evropës, nuk duhet të përdoren për të blerë vetëm armë amerikane, duke nxitur më shumë investime në industritë e mbrojtjes në vend.

Duke folur disa minuta para inaugurimit të presidentit të SHBA-së, Donald Trump, i cili është ankuar se evropianët nuk paguajnë mjaftueshëm për mbrojtjen e tyre, Macron tha se kontinenti duhet të shpenzojë më shumë, transmeton Telegrafi.

Por ai shtoi, në një fjalim të Vitit të Ri drejtuar drejtuesve të ushtrisë: “Ne nuk mund të mbledhim borxhe së bashku, të shpenzojmë më shumë për mbrojtjen tonë për të subvencionuar industrinë, pasurinë dhe punët e kontinenteve të tjera. Kur themi ‘le të shpenzojmë më shumë për ushtritë tona’, në shumë vende do të thotë, shumë shpesh, ‘blejmë më shumë materiale amerikane'”.

Franca, e cila ka një industri të madhe të mbrojtjes, shpesh është ankuar kur anëtarët e tjerë të Bashkimit Evropian kanë zgjedhur të blejnë armë amerikane kur ekzistojnë alternativa franceze ose evropiane.

Vendimi i Gjermanisë në vitin 2022 për të nisur sistemin e mbrojtjes ajrore “European Sky Shield” me pajisje amerikane dhe izraelite, duke injoruar një alternativë franko-italiane, zemëroi veçanërisht Macron.

Shqetësime të tilla janë hedhur poshtë si egoiste nga vendet që janë mbështetur në ombrellën e sigurisë së SHBA-së, të paktën që nga Lufta e Dytë Botërore. Por qëndrimi më agresiv i Trump i ka bërë anëtarët e BE-së më të hapur.

Macron tha se evropianët duhet gjithashtu të thjeshtojnë industrinë evropiane të mbrojtjes. Evropa ka 47 platforma të ndryshme industriale për industrinë e saj detare, ndërsa SHBA-ja ka vetëm gjashtë, tha ai.

Ai bëri thirrje për më shumë zhvillim të përbashkët evropian të armëve, edhe pa kompanitë franceze në krye, duke shtuar: “Ne nuk do të jemi gjithmonë kampionë evropianë. Por të paktën do të jemi të sigurt që kampionët evropianë kanë një shtrirje globale”.

Macron tha se Franca tani ka “ushtrinë më efikase të Evropës” dhe përmbushi objektivin e buxhetit ushtarak të NATO-s prej 2 për qind të GDP-së.

Ai tha gjithashtu se Rusia do të përbënte një sfidë sigurie për Evropën dhe botën më gjerë për një kohë të gjatë, edhe nëse do të kishte një fund të luftës në Ukrainë, të cilën Trump premtoi ta përfundonte brenda 24 orëve pasi u bë president.

“Të mos gënjejmë veten, ky konflikt nuk do të zgjidhet nesër. As pasnesër”, tha ai, duke shtuar se paqja në Evropë kërkon që evropianët të jenë në tryezën e bisedimeve. /Telegrafi/