Analisti dhe njohësi i rrethanave politike, Imer Mushkolaj ka komentuar iniciativat e fundit rajonale për një Mini “Shengen ballkanik”.

Mushkolaj, në “Debat Plus” me Ermal Pandurin në RTV Dukagjini ka thënë se iniciativat rajonale në parim janë të mirëseardhura por ai ka thënë se në kontekstin aktual Kosova nuk është e barabartë me shtetet tjera.

“Kosova nga kjo nismë nuk përfiton asgjë. Kjo është një nismë Edi Ramës dhe Aleksandar Vuçiqit për të dërguar përpara protagonizmin e tyre. Mali i Zi dhe Bosnja nuk ishin aspak entuziaste”.

Analisti ka thënë se kjo nismë ka për qëllim që Serbia të anashkaloi njohjen e Kosovës për të arritur kapitullin 35 që do t’i mundësonte anëtarësimin e saj në Bashkimin Evropian.

Mushkolaj ka thënë se iniciativa do të dështojë dhe sipas tij nuk ka nevojë për brengosje pse Kosova nuk është pjesëmarrëse.

Analisti ka thënë se është e pafalshme që Kosova ka mësuar nga televizori për një samit rajonal ku është prezente edhe Shqipëria.

“Është e pafalshme absolutisht. Ne po flasim për bashkëpunim rajonal kur bashkëpunimin Kosovë-Shqipëri e kemi në nivel shumë të ulët”, tha ai.

Mushkolaj ka thënë se Serbia konsultohet me Republikës serbe të Bosnjës që është vetëm një entitet e nuk e ka problem ndërsa sipas tij Shqipëria nuk e njofton Kosovën./Telegrafi/