Munishi kritikon Sampaolin: Me mu si trajner të Argjentinës, tjerat kombëtare do të luftonin vetëm për vendin e dytë    

Ismet Munishi ka folur në lidhje me kombëtaren e Argjentinës, e në veçanti trajneri e tyre, Jorge Sampaoli.

Argjentina u eliminua nga Kupa e Botës pas humbjes 4-3 nga Franca në fazën e 1/8-tës.

Kjo humbje ka bërë që trajneri i njohur kosovar, Munishi, ta kritikojë trajnerin e Argjentinës, ndërsa thuri elozhe për veten dhe tregoi se çfarë do bënte si trajneri i kombëtares Albiceleste.

Lexo po ashtu Franca në çerekfinale të Kupës së Botës pas fitores dramatike ndaj Argjentinës

“Sampaoli ka gabuar në rreshtim si në çdo ndeshje tjetër. Ka gabuar edhe në kualifikime, ku mezi u kualifikua”, ka thënë fillimisht Munishi në Dueli Botëror në RTV Dukagjini.

“Me qenë unë në rolin e trajnerit të Argjentinës, këto ekipet tjera do të kishin mundur të luftojnë vetëm për vendin e dytë, sidomos me këtë kualitet të lojtarëve”.

“Trajneri Sampaoli ka dashur të shpik një futboll me një sulmues jo të deklaruar, Messi mu tërheq e me sulmu në thellësi me Pavonin dhe Di Marian”.

“Ai nuk ka pasur kujdes të veçantë për Mbappen, i cili ka qenë lojtari më i rrezikshëm i ndeshjes dhe as Griezmannin nuk i ka kushtuar aq rëndësi”.

“Megjithatë, nuk e ka merituar Argjentina në këtë formë të shkoj në shtëpi”, përfundoi trajneri kosovar. /Telegrafi/