Mourinho shpjegon në mënyrë të shkëlqyeshme pse Ronaldo – jo Messi apo Cristiano Ronaldo, është më i miri ndonjëherë

Jose Mourinho ka shpërfillur Cristiano Ronaldon dhe Lionel Messin në pyetjen se kush është më i miri i të gjitha kohërave dhe në vend të kësaj zgjodhi ish-sulmuesin brazilian, Ronaldo Nazario.

Pyetja se kush është futbollisti më i madh i të gjitha kohërave shpesh lind dhe për shumë njerëz përgjigjja është ose Ronaldo ose Messi – por jo për strategun portugez.

Trajneri i Romës u pyet nga LiveScore se kush ishte lojtari më i mirë ndonjëherë dhe zbuloi se ishte Ronaldo Nazario, me të cilin ai ka punuar në Barcelonë.

“Ronaldo, El Fenomeno. Cristiano Ronaldo dhe Leo Messi kanë pasur karriera më të gjata, ata kanë qëndruar në krye çdo ditë për 15 vjet”,ka thënë Special One.

“Megjithatë, nëse po flasim rreptësisht për talentin dhe aftësinë, askush nuk e kalon Ronaldon (Nazarion). Kur ai ishte në Barcelonë me Bobby Robson, kuptova se ai ishte lojtari më i mirë që kisha parë ndonjëherë të dilte në fushë”.

“Lëndimet vranë një karrierë që mund të ishte edhe më e pabesueshme, por talenti që kishte ai djalë 19-vjeçar ishte diçka e pabesueshme”, vazhdoi Mourinho.

Ronaldo luajti vetëm një sezon për Barcelonën në 1996/97, pasi kishte luajtur më parë dy vjet për PSV-në dhe shënoi 34 gola në 37 ndeshje.

Braziliani vazhdoi të shënonte 352 gola në 518 paraqitje në të gjitha garat në karrierën e tij klubore dhe pa lëndime mund të ishte edhe më mirë. /Telegrafi/