Motoçikletë për heroin: Qytetarët francezë i blejnë motoçikletë të re, burrit që tentoi të ndalojë masakrën e Nice (Foto/Video)

Dy qytetarë nga Normandia kanë mbledhur më shumë se 21 mijë euro, me qëllim që t’i blejnë një motoçikletë të re heroit i cili ishte munduar të ndaloi me motoçikletë e tij, terroristin me kamion që shkeli 84 persona në shëtitoren e Nice.

Banorët e provincës Le Mans, kishin filluar javën e kaluar një aksion për mbledhjen e të hollave për blerjen e një motoçiklete të re për Alexander Miguel, që tani konsiderohet si heroi i Nices, i cili ishte përpjekur të ndaloi kamionin që la të vdekur 84 persona, transmeton Telegrafi.

Qëllimi i tyre ishte mbledhja e 9.000 eurove, por deri të martën në mëngjes janë mbledhur plotë 21.000 euro, derisa pjesa tjetër e parave do të shfrytëzohen për pajisje të reja për spitale dhe objektet e zjarrfikësve, që kishin ndihmuar shumë qytetarët gjatë masakrës së përgjakshme të Nice.

“Jemi prekur shumë me veprimin e këtij burri që ka mbetur pa motoçikletën e tij, edhe pse ishte i vetëdijshëm që sigurimi nuk do t’ia mbulojë shpenzimet, ai ishte nisur qëllimisht në drejtim të kamionit. Dëshirojmë të nderojmë gjithë heronjtë që kanë kontribuuar në parandalimin e masakrës”, ka thënë Sem Asan, njëri nga nismëtarët e këtij aksioni. /Telegrafi/