Mospërdorimi i kamerave të trupit nga policët, Inspektorati Policor i Kosovës me rekomandime urgjente

Inspektorati Policor i Kosovës ka gjetur se disa njësi të Policisë nuk janë duke i bartur kamerat trupore. Ky institucion ka rekomanduar që kjo gjendje të ndryshojë, në mënyrë që sipas IPK-së, që të ketë kontroll efektiv në përdorimin e forcës dhe trajtimin e incidenteve gjatë operacioneve.

Monitoruesit e një prej institucioneve më të rëndësishme të vendit, Policisë e Kosovës, kanë gjetur disa mangësi për përdorimin e kamerave të trupit nga ana e policëve.

Bëhet fjalë për disa gjetje të Inspektoratit Policor, i cili i ka publikuar rezultatet e një hetimi të jashtëzakonshëm për këtë çështje.
Një prej gjetjeve kryesoreve ishte se zyrtarët policorë të departamentit të kufirit nuk përdorin fare kamera të trupit, për çka edhe është nxjerrë një rekomandim.

“IPK i rekomandon Udhëheqësit të Departamentit të Kufirit, që urgjentisht të fillohet me përdorimin e kamerave të trupit dhe materialet e regjistrimeve video-audio të mbulojnë pjesë të rëndësishme të aktiviteteve operative siç parashihet në Procedurën Standarde të Operimit-Përdorimi dhe administrimi i kamerave të trupit”, thuhet nga Inspektorati Policor i Kosovës.

Ish-hetuesi policor, Visar Rrecaj beson se kjo nuk do të ishte e nevojshme për shkak të sistemit që kufijtë kanë.

“Sa i përket asaj që nuk janë përdorur në kufi, ky është një rekomandim të them të drejtën bosh sepse në secilën pikë kufitare janë të investuara kryesisht nga BE-ja dhe kur janë ndërtu, secila pikë kufitare përmban kamera të sofistikuara që marrin pamje audio dhe video edhe ditën edhe natën”, deklaroi Visar Rrecaj – ish-zyrtar policor.

Pos përdorimit të kamerave në kufi, IPK-ja ka kërkuar që kamerat e trupit për përdoren nga më shumë zyrtarë policorë.

“IPK i rekomandon Drejtorit të Përgjithshëm të Policisë, që të zgjerojë sistemin e përdorimit të kamerave të trupit dhe në njësi tjera policore, meqenëse mund të jenë mjet i fuqishëm në ngritjen e integritetit, kontrollit efektiv në përdorimin e forcës dhe trajtimin e incidenteve”, thuhet tutje në rekomandimet e IPK-së .

Të gjitha rekomandimet e Inspektoratit Policor janë aprovuar nga Policia e Kosovës, respektivisht atyre që i janë bërë në formë të kërkesave./Dukagjini/