(Mos)njohja nga Xhamajka, Osmani thotë se të gjithë duhet të kenë kujdes me deklarata

Kryetarja e Kuvendit të Kosovës, Vjosa Osmani, ka thënë se janë duke pritur një vlerësim zyrtar nga Ministria e Punëve të Jashtme të Kosovës, lidhur me lajmin se shteti i Xhamajkës e ka njohur pavarësinë e Kosovës.

Osmani ka thënë se të gjithë duhet të jenë të kujdesshëm më deklaratat e tyre, deri sa të sqarohen përfundimisht gjërat, transmeton Telegrafi.

“Ne jemi duke pritur një vlerësim zyrtar nga Ministria e Punëve të Jashtme lidhur me atë se çfarë ka ndodhur mbrëmë, natyrisht se si Kuvend i Kosovës jemi bazuar në informatën zyrtare dhe tani për tani duhet të gjithë të jemi të kujdesshëm deri në momentin e sqarimit përfundimtar. Duhet marrë sqarim përfundimtar nga MPJ, dhe pastaj do të deklarohem”, ka thënë Osmani gjatë një deklarimi për media në Gjilan, përcjell Telegrafi.

Ndryshe, presidenti i Kosovës, Hashim Thaçi, të enjten ka deklaruar se shteti Xhamajkës ka njohur pavarësinë e Kosovës, mirëpo një gjë e tillë është demantuar nga ministrja e Jashtme e Xhamajkës, e cila ka thënë se shteti i saj nuk ka njohur pavarësinë e Kosovës.

Lexo po ashtu Ministrja e Jashtme e Xhamajkës: Nuk e kemi njohur Kosovën

Ndërkohë, nga presidenca kanë bërë të ditur për Telegrafin, se lidhur me njohjen e pavarësisë nga Xhamajka, ata janë informuar nga ambasadorja Vlora Çitaku./Telegrafi/