Mjekja nga Wuhani tregon se çfarë duhet të vesh për t’u mbrojtur nga coronavirusi

Numri i pacientëve të rinj të prekur me coronavirus në Kinë është duke u zvogëluar dukshëm, pasi që në shkurt kaloi piku i krizës së pandemisë, kurse jeta dhe gjithçka tjetër në këtë vend po i kthehet normalitetit.

Më së shumti raste të reja janë regjistruar në Shangai, kurse provinca Hubei në të cilën jetojnë 60 milionë njerëz ka hapur kufijtë e saj, transmeton Telegrafi.

Ajo çfarë i ka kontribuar më së shumti është mbrojtja e mirë e punonjësve shëndetësorë, të cilët nuk kanë të regjistruar as edhe një rast me COVID-19 në mesin e punonjësve shëndetësorë që nga fillimi i shkurtit.

Infermieret në Wuhan punojnë nga katër orë në një ndërrim, kurse mjekët deri në gjashtë orë. Gjatë kësaj kohe nuk guxojnë të hanë, pinë e as që të shkojnë në tualet.

Një video që po qarkullon në masë të madhe nëpër rrjete sociale, shfaq mjeken e cila demonstron se çfarë duhet të bartë derisa punon në një spital në qytetin kinez Wuhan, epiqendra e coronavirusit.

Në Kinë janë shfuqizuar masat preventive siç ishte mbyllja e trafikut, ndërsa punimet nëpër objekte të ndryshme ka rifilluar, e qytetarët sërish po udhëtojnë me autobusë. /Telegrafi/