Femra Familja Këshilla për prindër

Mësojini fëmijët të përballen me situata stresuese

Para 3 vitesh

Përballë kërkesave që shoqëria moderne u vendos fëmijëve, është e rëndësishme të merren masa për të parandaluar stresin

Detyrimet shkollore që kanë fëmijët dhe presioni për t’u përshtatur me mjedisin dhe standardet sociale mund të shkaktojnë stres.

Prandaj, prindërit duhet t’i mësojnë fëmijët e tyre të sillen me vendosmëri në situata të tilla. Kjo është një nga detyrat më të rëndësishme që prindërit kanë përpara, transmeton Telegrafi.

Nëse vëreni ndryshime të papritura në humor ose sjellje, fëmija juaj mund të ketë nevojë për vëmendje të veçantë.

Irritimi dhe ankthi mund të tregojnë stres

Kjo gjendje mund të manifestohet edhe me humbje gjumi, mungesë oreksi dhe motivimi. Nëse vëreni ndonjë nga këto shenja, duhet të zbatoni strategjitë e mëposhtme si një mjet parandalimi.

Ngadalësoni dhe ulni presionin në rutinën tuaj të përditshme

Fëmijët që janë gjithmonë me nxitim nuk kanë kurrë kohë për qetësi. Para se t’i çoni në shkollë në mëngjes, jepini kohë të përgatiten me qetësi.

Të nisësh ditën duke bërtitur, duke u ankuar dhe kërcënuar nuk është rruga për një ditë të relaksuar. Sigurohuni që çdo gjë të jetë gati për të nesërmen një natë më parë, kjo do të ndihmojë që mëngjeset të jenë shumë më të qeta.

Bisedoni me fëmijët tuaj sa herë të keni mundësi

Është e rëndësishme të dini nëse ka diçka në jetën e fëmijëve tuaj që po i rëndon ata. Pyetini nëse kalojnë mirë në shkollë dhe shoqëri.

Sigurisht, ju nuk mund të zgjidhni çdo problem që kanë fëmijët tuaj dhe as nuk duhet ta provoni. Por ju mund të jeni udhërrëfyesi i tyre dhe t’i ndihmoni ata të reagojnë siç duhet.

Kufizoni pjesëmarrjen e tyre në aktivitetet jashtëshkollore

Ka një tendencë në rritje tek prindërit për të regjistruar fëmijët e tyre për aktivitete të ndryshme artistike dhe sportive. Ndërsa kultivimi i interesave dhe talenteve është i rëndësishëm, është gjithashtu e rëndësishme t’u jepet atyre kohë për të qenë thjesht fëmijë – të lirë dhe të papenguar.

Bëhuni një model për sjelljen e sigurt

Mënyra më e mirë për të rritur fëmijët është të përdorni shembullin tuaj. Nëse dëshironi që fëmijët tuaj të mësojnë të reagojnë në mënyrë të shëndetshme në situata që i tundojnë, është mirë të silleni vetë në këtë mënyrë.

Fusni rutinën e gjumit të shëndetshëm

Fëmijët që flenë mjaftueshëm dhe pushojnë mirë janë më pak të prirur ndaj stresit dhe janë më të përgatitur për të përpunuar informacionin që hasin në shkollë.

Kufizoni përdorimin e teknologjisë

Fëmijët që kalojnë orë të tëra para ekranit kanë më shumë gjasa të vuajnë nga stresi. Lërini të luajnë jashtë dhe të kalojnë pak kohë larg televizorit, tabletit dhe celularit. Nuk ka asgjë më të mirë për fëmijët sesa të kalojnë kohë cilësore me familjen e tyre. /Telegrafi/