“Mësimi tërëditor”, Abdixhiku vlerëson lart reformën e arsimit në Prishtinë të udhëhequr nga Jehona Lushaku

Kryetari i Lidhjes Demokratike të Kosovës (LDK), Lumir Abdixhiku, ka vlerësuar lart reformën e arsimit në Komunën e Prishtinës që është iniciuar dhe udhëhequr nga drejtoresha komunale e arsimit, Jehona Lushaku-Sadriu.

Në një postim në Facebook, Abdixhiku përshkroi “vendosmërinë dhe përkushtimin” e Lushakut për të sjellë një ndryshim të rëndësishëm në sistemin arsimor të kryeqytetit.

Sipas tij, ideja për të krijuar një model të ri të mësimit gjithëditor për fëmijët e klasave 1-5 ishte një ide e guximshme.

“Jehona më tha: ‘Kam një ide. Aspak e lehtë por mund t’ia dal’. Dhe nisi shpjegimin me plot bindje,” shkroi Abdixhiku, duke përmendur se Lushaku kishte për qëllim të rrisë kohën që fëmijët kalojnë në shkollë, nga katër orë në një ditë të plotë mësimi, duke përfshirë aktivitete të ndryshme pas mësimit dhe drekën në shkollë.

Kjo reformë kërkoi që disa shkolla të bashkohen, të rinovohen dhe të pajisen me kuzhina të reja për të shërbyer ushqim cilësor për fëmijët. Përveç kësaj, Lushaku organizoi konsultime të gjera me prindër, mësimdhënës dhe akterë të tjerë të interesuar, për të siguruar që gjithçka të ishte gati para fillimit të vitit shkollor në shtator.

Rezultati i kësaj pune të palodhur është që nga 1 shtatori, pesë shkolla ikonike të Prishtinës, përfshirë “Faik Konica”, “Xhemail Mustafa”, “Nazim Gafurri”, “Shkolla e Gjelbër” dhe “Qamil Batalli”, do të ofrojnë mësim gjithëditor për rreth 3,000 fëmijë.

Abdixhiku theksoi se ky model i ri do të përhapet edhe në shkolla të tjera në të gjithë Kosovën, duke shënuar një hap të madh përpara në përmirësimin e sistemit arsimor të vendit.

“Jehona është një shembull i shkëlqyer i asaj se si njerëzit e duhur në vendet e duhura mund të bëjnë ndryshime të mëdha,” përfundoi Abdixhiku./Telegrafi/