Në mesin e shumë historive që tregojnë forcën dhe brishtësinë e njeriut, rasti i Afërditës nga Peja ngjall dhembshuri e solidaritet.
Prej shtatë vitesh ajo po lufton me një tumor që ia ka vështirësuar jetën në çdo aspekt.
Afërdita është një grua që jeton e vetme dhe pa mbështetje familjare. Për shkak të gjendjes shëndetësore, ajo nuk ka mundësi të punojë dhe për këtë arsye përballja me kostot e larta mjekësore është bërë gjithnjë e më e rëndë. Përveç trajtimeve, ajo ka nevojë edhe për dikë që të kujdeset për të në përditshmëri.
Në përpjekje për të gjetur ndihmë, Afërdita iu drejtua publikut përmes një publikimi të JOQ Albania, ku rrëfeu vështirësitë dhe kërkoi mbështetje. Ky apel nuk mbeti pa përgjigje.
Fondacioni “Golden Eagle” me presidentin Shaqir Palushi në krye, reagoi menjëherë duke dhuruar 5000 euro për Afërditën. Ky gjest i radhitet kontributeve të shumta të fondacionit në kauza humanitare, ku për vite me radhë ka ndihmuar individë e familje në nevojë.
Për të gjithë ata që dëshirojnë të ndihmojnë më tej Afërditën, është vënë në dispozicion numri: +383 49 174 862.
