Mercedes në heshtje ka ndryshuar logon

Mercedes ka ndryshuar në mënyrë diskrete logon e saj ikonë, pa shumë bujë.

Nuk kishte asnjë ngjarje të veçantë, njoftim për shtyp apo spektakël, transmeton Telegrafi.

Ndryshimi u prezantua në heshtje dhe pothuajse në mënyrë të padukshme.

Që nga shkurti i vitit 2025, ylli i famshëm nuk shfaqet më në një version tredimensional të kromit, por përkundrazi shfaqet i sheshtë dhe në të bardhë në të gjitha komunikimet zyrtare të prodhuesve, shkruan Auto Bild.

Dizajni i ri, minimalist tashmë mund të shihet në raportin vjetor, në mediat sociale, në email dhe dokumente zyrtare.

Megjithatë, të apasionuarit pas retros mund të marrin frymë të lehtësuar: ylli i njohur 3D i argjendtë do të mbizotërojë ende mbi kapaët e motorëve, timonë dhe pjesën e pasme.

Vendimi për ndryshim është mbajtur me vetëdije brenda kompanisë.

Qëllimi i pamjes së re është ta bëjë markën të duket më moderne, më e pastër dhe më efikase.

Dhe, sigurisht, për t’u përshtatur më mirë me kanalet digjitale, sepse versioni i sheshtë thjesht funksionon më mirë në ekrane.

“Duke rifreskuar dizajnin tonë të korporatës, Mercedes-Benz po redukton praninë e së zezës si një ngjyrë dominuese në identitetin vizual të markës. E kombinuar me përdorimin e një versioni 2D të logos sonë, yllin e Mercedesit, për mediat e shkruara dhe digjitale, pamja do të jetë më bashkëkohore dhe vizualisht konsistente”, u tha nga Mercedes.

“Ylli tredimensional do të vazhdojë të zbukurojë automjetet tona dhe elementet arkitekturore dhe si markë tregtare, mishëron elegancën e përjetshme, inovacionin dhe mjeshtërinë superiore”, tha një zëdhënës i Mercedes.

Ylli i bardhë, nuk është krejtësisht i ri. Në vitin 2007, Mercedes luajti shkurtimisht me një version të sheshtë, por shpejt e braktisi atë.

Tashmë në vitin 2010, nën drejtimin e shefit të atëhershëm Dieter Zetsche, kompania iu rikthye dizajnit tredimensional sepse dukej më prestigjioze.

Tani vjen një përpjekje e re, në një epokë kur thjeshtësia është bërë standardi i ri i luksit.

Ylli tredimensional daton në vitin 1909 dhe simbolizon vizionin e Daimler-it – motorët transportuese për tokë, ujë dhe ajër.

Që atëherë, dizajni ka pësuar ndryshime të shumta – nga një version i artë, në një kurorë dafine, në pamjen e sotme të rafinuar. Megjithatë, ylli nuk u zhduk kurrë. /Telegrafi/