Masa ligjore ndaj 26 personave të dyshuar në Gjakovë, nuk respektuan orën policore, luanin bixhoz, posedonin armë dhe narkotik

Policia e Kosovës rreth orës 00:30 në Gjakovë ka pranuar një informatë se disa persona ndodheshin duke luajtur lojëra të fatit, ndërsa pas reagimit me njësitet e saj policore ka hasur në 26 persona të dyshuar të cilët ishin duke zhvilluar aktivitetin e kundërligjshëm.

Gjatë bastisjes dhe kontrollit në lokacion policia ka gjetur një armë dhe një sasi të substancës së dyshuar narkotike të llojit kanabis.

Personat e dyshuar janë shoqëruar në stacionin policor në Gjakovë dhe janë intervistuar. Bazuar në ligjin në fuqi të gjithë të dyshuarve iu është shqiptuar nga një gjobë për mosrespektimin e orës policore.

Në vendngjarje ka dalë edhe njësia e hetimeve ku është bërë konfiskimi e armës, sasisë së substancës narkotike dhe të gjitha provat dhe dëshmitë për aktivitetin e kundërligjshëm të lojërave të fatit.

Në lidhje me rastin është informuar edhe prokurori kujdestar ku me urdhër të tij, iniciohen tri vepra penale “Organizimi i skemave piramidale dhe i bixhozit të paligjshëm” “Mbajtje në pronësi, kontroll ose posedim të paautorizuar të armëve”, dhe “Posedim i paautorizuar i narkotikëve, substancave psikotrope ose analoge” për hetime të mëtejme në procedurë të rregullt. /Telegrafi/